Qazaqstanda monsha men SPA ortalyqtarynda qyzmet quny qansha
ASTANA. KAZINFORM — Qazaqstan qalalarynda qoǵamdyq monsha men SPA-salondardyń qyzmet kórsetý baǵasy ártúrli. Keı jerde ystyq bý men sypyrtqy quny myń teńge tóńireginde bolsa, elordadaǵy SPA ortalyqtary óz baǵdarlamasyna 120 myń teńge de suraıdy, dep habarlaıdy Kazinform agenttiginiń tilshisi.
Monsha men SPA-salondardyń baǵasyn salystyrǵan kezde oblystar arasynda da, demalys túrine qaraı da baǵa aıyrmashylyǵy bar ekenin kórýge bolady. Elimiz boıynsha Túrkistan qalasynda qoǵamdyq monshaǵa kirý quny arzan. Munda 700 — 2 500 teńge berip, ystyq býda otyrýǵa bolady. Al eń qymbaty Pavlodar qalasynda. Munda keıbir monsha qyzmetiniń baǵasy 25 000 teńgege deıin jetedi.
Qazaqstan monshaǵa kirý aqysy orta eseppen 1 500 — 6 000 teńge aralyǵynda. Іri qalalarda baǵa joǵary. Máselen Astana qalasynda monshaǵa túsý quny 3 000 — 10 000 teńge, al Qaraǵandyda 4 000 — 6 000, Almatyda 1 000 — 3 000 teńge aralyǵynda.
SPA-salondarynyń qyzmet aqysy múlde bólek. Munda baǵa 9 000 teńgeden bastalyp, tipti keshendi baǵdarlamasy 120 000 teńgege deıin jetedi. Eń qymbaty Astana qalasynda. Mundaǵy baǵa — 30 000 — 120 000 teńge aralyǵynda. Sonymen birge Almatydaǵy baǵa — 20 000 — 100 000 teńge aralyǵynda. Shymkentte SPA qyzmetiniń quny 31 000 — 55 000 teńge aralyǵynda, al Atyraý men Kókshetaýda 85 myń teńgege deıin jetedi. Oral men Aqtóbe qalalarynda SPA-salondaryndaǵy baǵdarlama quny 10 000 — 20 000 myń teńge aralyǵynda.
SPA-salondaryndaǵy baǵdarlamada adamdy tynyshtandyryp, apta ishindegi qarbalasty umyttyratyn klassıkalyq massaj da bar. Shyǵys úlgisindegi baǵdarlamany tańdasańyz deneni ysyp beredi, hosh ıisti maı jaǵyp, orap, shaı usynady. Sonymen birge betke, basqa, aıaq-qolǵa massaj jasaıdy. Keıbir ortalyqtarda óz SPA baǵdarlamasy bar. Olar tuz, túrli shóp pen efır maıyn qoldanyp, tabıǵı jolmen adam tánine rahat syılaıdy.
Baǵaǵa tek qyzmet kórsetý túri emes, salonnyń qaı mańda ornalasqany da áser etedi. Eger megapolıstiń ortalyǵynda, týrıster kóp júretin jerde ornalassa jalǵa alý ornyna, sheberlerdiń kásibıligine jáne zal ishindegi jabdyqtarǵa qaraı baǵa joǵary bolady.
Qazir Túrkistan men Tarazda qyzmet kórsetý quny tómen bolsa, Almaty men Astanada baǵa joǵary. Bir sózben aıtqanda Qazaqstannyń kez kelgen qalasynan jan men tán tynyshtyǵyn úshin jaıly SPA ortalyqtaryn tabýǵa bolady. Munda hosh ıisti shaı iship, shyǵys áýenderin tyńdap, massaj jasatyp alasyz. Buǵan deıin Qazaqstandaǵy dóńgelek aýystyrý qyzmetiniń quny, qalalardaǵy jylý baǵasy týraly jazyldy.