Qazaqstanda monopolııalyq jáne kvazımemlekettik kásiporyndar beretin ruqsattar tekserilýde
Mınıstrliktiń atap ótýinshe, 2006 jylǵy 29 naýryzda Memleket basshysynyń tapsyrmasymen bızneske ákimshilik qysymdy azaıtý maqsatynda ruqsat qujattarynyń kólemin 50 paıyzǵa deıin qysqartýdy qarastyrǵan zań qabyldandy. Atalǵan zańǵa sáıkes, 34 ruqsat kúshin joıyp, 14-i habarlama tártibine aýystyryldy, 106-sy ońtaılandyrý maqsatynda alynyp tastaldy. Memleket basshysy 2017 jyldyń basyndaǵy Qazaqstan halqyna arnaǵan óz Joldaýynda damýdyń jańa modelin qurý mindetine qoldanystaǵy bızneske retteýshi júktemeniń saı kelmeıtinin atap aıtty. Prezıdent Úkimet pen ákimderdiń aldyna aǵymdaǵy jylǵy 1 shildege deıin bıznesti qaıta retteýdiń júıeli sharalaryn ázirleý mindetin qoıdy.
«Júrgizilgen taldaý kezinde kvazımemlekettik sala men tabıǵı monopolııalar sýbektileriniń ruqsat qujattaryn beretini nemese ruqsat rásimdeýlerin júzege asyratyny belgili boldy. Sonymen qatar mundaı ruqsattar zańnamada rettelmegen. Kóbine olardy berý tártibi júıelenbegen, bul óz kezeginde kásipkerlerge qıyndyq týǵyzady jáne ýaqyt jaǵynan da, qarjy jaǵynan da edáýir shyǵyndarǵa alyp keledi», - dedi Ulttyq ekonomıka mınıstrliginen.
Máselen, «Qazavtojol» AQ halyqaralyq jáne respýblıkalyq mańyzdy avtokólik joldarynyń boıyndaǵy syrtqy jarnamalardy ornalastyrýǵa, magıstraldyq temirjol jelileriniń operatory ruqsat rásimdeýleri bolyp sanalatyn júkterdi tasymaldaý josparyna ruqsat berse, energııamen jabdyqtaýshy uıymdar elektr jelilerine qosylý úshin tehnıkalyq jaǵynan qamtamasyz etedi.
«Osyǵan baılanysty, monopolııalyq jáne kvazımemlekettik qyzmetter salasyndaǵy ruqsat júıesin reformalaý boıynsha jumystar bastalyp otyr. Atalǵan reformanyń maqsaty osyndaı ruqsattardy ońtaılandyrý men júıeleý, olardy qoldanýdy bir izge túsirý jáne zańnamalyq retteý bolyp tabylady», - dedi vedomstvo.
Búginde monopolııalyq jáne kvazımemlekettik kásiporyndar beretin barlyq ruqsattardy tekserý júrgizilýde, onyń qorytyndysy boıynsha tizbe jasalynady.
«Bolashaqta anyqtalǵan ruqsattardyń oıǵa qonymdylyǵy turǵysynda atalǵan tizbege taldaý jasaý josparlanyp otyr. Osylaısha, bul jumystar túrli ustalatyn shyǵyndarǵa ákelip soǵatyn jáne básekege qabiletti kásipkerlik salany qurýǵa jáne damytýǵa kedergi keltiretin talaptardy qysqartý jolymen bıznesti júrgizýge qolaıly jaǵdaı jasaýǵa múmkindik beretin bolady», - dedi mınıstrlikten.
