Qazaqstanda monopolııaǵa qarsy kompleans ınstıtýty engizilmek

ASTANA. QazAqparat - Elimizde monopolııaǵa qarsy kompleans ınstıtýtyn engizý kózdeledi. Bul týraly búgin Májiliste «Qazaqstan Respýblıkasynyń keıbir zańnamalyq aktilerine monopolııaǵa qarsy zańnamany jetildirýge baǵyttalǵan ózgerister men tolyqtyrýlar engizý týraly» zań jobasyn tanystarǵan Ulttyq ekonomıka vıtse-mınıstri Aıdar Áriphanov málim etti.

Vıtse-mınıstrdiń aıtýynsha, monopolııaǵa qarsy komplaens osy salany retteýdegi mańyzdy quraldardyń biri bolyp tabylady. Bul qural álemniń kóptegen jetekshi memleketterinde qoldanylyp keledi. Sonymen qatar, atalmysh ınstıtýt monopolııaǵa qarsy organǵa naryq sýbektilerine ortaq qaǵıdattar men saýda naryǵyndaǵy qalyptasqan erejelerdi ustaný týraly usynys jasaý quqyǵyn beredi.

«Buny iskerlik etıka kodeksi, bıznes-praktıka dep te ataýǵa bolady. Jalpy mundaı ınstıtýttyń engizilýi Eýropalyq Odaq elderindegi sekildi kelisimsharttarǵa qol jetkizý úshin úlgige aınalady. Budan bólek, monopolııaǵa qarsy kompleansty qabyldaǵan naryq sýbektilerine etıkalyq qaǵıdattarǵa sáıkes bıznesti júrgizý múmkindigin beredi. Osynyń ózi bıznestiń bedeline zııan keltiretin jaǵdaılardyń aldyn alady», - dedi A.Áriphanov.

Eske sala ketsek, monopolııaǵa qarsy komplaens (Monopolııaǵa qarsy zańnama buzylýynyń aldyn alýǵa baǵyttalǵan ishki júıe) sharýashylyq etýshi sýbektiniń jergilikti normatıvtik aktilerinde qarastyrylǵan, olardyń monopolııaǵa qarsy zańnamany saqtaýyn qamtamasyz etýin qarastyratyn quqyqtyq, uıymdastyrýshylyq jáne basqa da sharalar jıyntyǵy bolyp tabylady.