Qazaqstanda monopolııaǵa qarsy baqylaý tásili ózgeredi: bızneske ne ózgeredi
ASTANA. KAZINFORM — Qazaqstanda taýar naryqtaryndaǵy básekelestikti baǵalaý tártibi ózgerdi. Endi josparly taldaý 6 aıdyń ornyna 12 aıǵa deıin, al jospardan tys taldaý 3 aıdyń ornyna 6 aıǵa deıin júrgiziledi. Básekelestikti qorǵaý jáne damytý agenttigi jańa ádistemeni EYDU usynymdary negizinde ázirledi. Bul týraly agenttiktiń baspasóz qyzmeti málim etti.
Ózgerister EYDU-nyń 2025 jyly Qazaqstannyń básekelestik zańnamasy men saıasatyna júrgizgen saraptamalyq sholýynyń usynymdary negizinde ázirlendi. Olar ekonomıkalyq taldaý sapasyn arttyrýǵa, básekelestiktiń jaı-kúıin baǵalaýdyń obektıvtiligin qamtamasyz etýge jáne qabyldanatyn sheshimderdiń ashyqtyǵyn arttyrýǵa baǵyttalǵan.
Qujat jobasy «Atameken» ulttyq kásipkerler palatasy men salalyq bıznes qaýymdastyqtarynyń qatysýymen jarııa talqylaýdan ótti. Talqylaý barysynda kelip túsken eskertýler men usynystardy Agenttik qaraǵan.
Agenttiktiń málimetinshe, negizgi ózgeristerdiń biri — taýar naryqtaryn taldaý merzimderiniń uzartylýy. Josparly taldaý júrgizý merzimi 6 aıdan 12 aıǵa deıin, al jospardan tys taldaý júrgizý merzimi 3 aıdan 6 aıǵa deıin uzartyldy. Qajet bolǵan jaǵdaıda bul merzimderdi bir ret úsh aıǵa deıin uzartý múmkindigi qarastyrylǵan. Atalǵan ózgeris EYDU usynymdaryn eskere otyryp engizildi. Uıym buǵan deıin qoldanysta bolǵan merzimderdiń múshe elderde qoldanylatyn merzimderden edáýir qysqa ekenin atap ótken bolatyn.
Básekelestikti taldaýdyń ekonomıkalyq quramdas bóligi kúsheıtildi. Jańartylǵan Ádistemede naryqtyq bılikti baǵalaýdyń qosymsha quraldaryn, onyń ishinde Lerner koeffıtsıenti men suranystyń aıqaspaly ıkemdiligin qoldaný kózdelgen. Sondaı-aq naryqtyq shoǵyrlaný kórsetkishteriniń shekti mánderi naqtylandy. Bul naryqtyń qurylymdyq sıpattamalarymen ǵana shektelmeı, básekelestik ortany jan-jaqty baǵalaýǵa múmkindik beredi.
Qorytyndylardyń obektıvtiligin arttyrý maqsatynda naryq dınamıkasyn zertteý kezeńi keńeıtildi. Josparly taldaý júrgizý kezinde naryqtyń bes jyl ishindegi jaı-kúıin zerdeleý jáne básekelestiktiń damýyna áser etetin sebep-saldarlyq baılanystardy anyqtaý kózdelgen. Sonymen qatar taýar naryqtaryna kirý kedergilerin baǵalaý tásilderi jetildirildi.
Taldaý barysynda paıdalanylatyn aqparat kózderiniń aıasy da keńeıtildi. Atap aıtqanda, taýarlardyń naqty ótkizilýi týraly salyq jáne keden organdarynyń málimetterin paıdalaný múmkindigi qarastyrylǵan. Bul bastapqy derekterdiń anyqtyǵyn arttyryp, esepteýlerdiń dáldigin qamtamasyz etýge múmkindik beredi.
— Básekelestik beıtaraptyqty qamtamasyz etý máselesine de erekshe nazar aýdaryldy. Josparly taldaý aıasynda memlekettiń taýar naryqtaryna qatysýynyń oryndylyǵyn baǵalaý jáne básekelestikti damytý jóninde usynymdar ázirleý kózdelgen. Budan bólek, júrgizilgen taldaý nátıjeleri boıynsha konglomerattardy aıqyndaý tártibi belgilendi, — delingen habarlamada.
Rásimderdiń ashyqtyǵy men boljamdylyǵyn arttyrý maqsatynda josparly taldaý júrgizý úshin taýar naryqtaryn irikteýdiń biryńǵaı ólshemsharttar tizbesi bekitildi. Sondaı-aq taldaýdyń bastalý kúnin aıqyndaý jáne onyń nátıjelerin resimdeý tártibi naqtylandy. Taldaý qorytyndylary boıynsha jasalǵan tujyrymdarǵa Agenttiktiń tıisti bólimshesiniń basshysy qol qoıady. Jańa mán-jaılar anyqtalǵan jaǵdaıda qorytyndylardy qaıta pysyqtaý múmkindigi qarastyrylǵan.
Engizilgen ózgerister básekelestikti taldaýdyń ulttyq tásilderin EYDU elderiniń tájirıbesine odan ári jaqyndatýǵa, monopolııaǵa qarsy organ qabyldaıtyn sheshimderdiń negizdiligin arttyrýǵa jáne kásipkerlik qyzmet úshin neǵurlym ashyq ári boljamdy jaǵdaılar qalyptastyrýǵa baǵyttalǵan.
Ádistemeni jetildirý Qazaqstannyń taýar naryqtaryndaǵy básekelestikti shekteıtin faktorlardy anyqtaý jáne básekelestik ortany damytý jónindegi sharalardy ázirleý tıimdiligin arttyrýǵa múmkindik beredi.
Eske sala keteıik, buǵan deıin Qazaqstanda bızneske qatysty monopolııaǵa qarsy talaptar kúsheıetinin jazdyq.
