Qazaqstanda monıtorıng toptary jumysynyń jańa algorıtmi bekitildi
NUR-SULTAN. QazAqparat – Qazaqstanda monıtorıng toptarynyń jumysynyń jańa algorıtmi bekitildi. Bul týraly tolyǵyraq Qazaqstan Respýblıkasy kásipkerleriniń quqyqtaryn qorǵaý jónindegi ýákili Rústem Júrsinov Facebook paraqshasynda jazdy, dep habarlaıdy QazAqparat tilshisi.
«Bizdiń barlyq usynysymyz enbese de, keıbiri algorıtmniń sońǵy mátinine kirdi. Basqa da usynystardy Densaýlyq saqtaý mınıstrligi qoldap otyr. Algorıtmniń mazmuny týraly negizgi jańashyldyqtardy aıtyp bereıin», - dep jazdy Rústem Júrsinov.
Onyń aıtýynsha birinshiden, monıtorıng toptaryn jergilikti atqarýshy organdar jasaqtaıdy. Onyń quramyna ákimdiktiń, polıtsııanyń jáne basqa da múddeli taraptardyń ókilderi kiredi. Olardyń maqsaty - koronavırýs ınfektsııasynyń taralý qaýpiniń týyndaýyna jol bermeý, epıdemııaǵa qarsy jáne sanıtarlyq-profılaktıkalyq sharalardyń júrgizilýin baqylaý, shekteý sharalaryn zańdy jáne jeke tulǵalardyń saqtaýyn baqylaý.
«Ekinshiden, monıtorıng toptarynan tártip nemese ereje buzýshylyqtar týraly málimet alatyn jáne Kásipkerlik kodeks sheńberinde tolyqqandy tekserý júrgizý úshin shuǵyl habarlamalardy sanıtarlyq-epıdemıologııalyq qyzmetke (SEQ) jedel jiberetin Úılestirý beketteri jumys isteıdi. Úshinshiden SEQ sanıtarlyq-epıdemologııalyq baqylaýǵa jatatyn nysandarǵa qatysty tekserý júrgizedi. Tórtinshiden SEQ sanıtarlyq erejeler óreskel túrde buzylǵan jaǵdaıda prokýratýraǵa habar beredi. Bul jerde áńgime Ákimshilik kodekstiń 425-baby týraly bolyp otyr. Al sanıtarlyq talaptardy qaıta-qaıta buzatyndardyń jumysyn toqtatýǵa deıingi shara qabyldanady. Biraq bul rette eskertýdi elemegenderdiń ǵana jumysy toqtatylatynyn aıta ketý kerek», - deıdi ol.
Rústem Júrsinovtyń habarlaýynsha besinshiden ákimshilik jaýapkershilik tek baqylaý paraǵynda kózdelgen tártip buzýshylyqtar úshin taǵaıyndalýy múmkin (24 pýnkt boıynsha, qazir olardyń sanyn 20-ǵa deıin azaıtý kózdelgen).
«Dostar, qarapaıym tilmen aıtqanda Kásipkerlik kodeks sheńberindegi tekserý ınstıtýty keńirek qoldanylady. Bul durys rettelgen júıe. Alaıda qazirgi ýaqytta monıtorıng toptary júrgizip jatqan baqylaý jumystary esh toqtamaıdy. Sanıtarlyq-epıdemıologııalyq baqylaý komıteti, Densaýlyq saqtaý jáne Іshki ister mınıstrlikteri ózara kelise otyryp, monıtorıng toptarynyń tekseristeri tek óreskel buzýshylyqtarǵa baǵyttalýy kerek degen sheshimge kelip otyr. Atap aıtqanda ol toptar nysan jumysynyń rejımi buzylsa, kelýshilerdiń sany artqan jaǵdaıda, tyıym salynǵan nysandardyń jumysyn qadaǵalaýǵa, maska rejıminiń saqtalmaýyna qatysty tekseris júrgizedi», - deıdi ol.
