Qazaqstanda mobıldi ınternetti paıdalanýshylar sany 18,5 mıllıonǵa jetti
ASTANA. KAZINFORM — 2026 jyldyń qańtar–maýsym aılarynda baılanys qyzmetteriniń naqty kólem ındeksi 104,3% boldy. Bul byltyrǵy osy kezeńindegi 103,1%-dyq kórsetkishten joǵary. Bul týraly Ulttyq statıstıka bıýrosy málimdedi.
Ulttyq statıstıka bıýrosynyń dereginshe, jarty jylda kórsetilgen baılanys qyzmetteriniń kólemi aqshalaı 777,7 mlrd teńgege jetti. Ótken jyldyń sáıkes kezeńinde bul kórsetkish 718,3 mlrd teńge bolǵan.
Naryq qurylymynda eń úlken úles uıaly baılanys qyzmetterine tıesili — 37,2%. Internet qyzmetteri 37,0%, ózge telekommýnıkatsııalyq qyzmetter 15,9% quraıdy.
2026 jylǵy maýsymdaǵy málimet boıynsha, elimizde uıaly baılanys abonentteriniń sany 27,3 mıllıonǵa jetti. Sonyń ishinde 18,5 mıllıon adam mobıldi ınternetti paıdalanady.
Turaqty ınternetke qosylǵan abonentter sany 3,47 mıllıon bolsa, tirkelgen telefon jelileriniń sany 2,04 mıllıondy qurady.
Baılanys qyzmetteriniń eń joǵary kólemi ádettegideı Almaty qalasynda tirkeldi — 402,4 mlrd teńge. Odan keıin Astana qalasy tur — 229,5 mlrd teńge. Óńirler arasynda Qaraǵandy oblysy 13,9 mlrd teńgemen kósh bastasa, Aqmola oblysynda kórsetkish 12,5 mlrd teńgege jetti.
Al poshta jáne kýrerlik qyzmet kórsetý salasynda kerisinshe tómendeý baıqaldy. Bul baǵyttaǵy naqty kólem ındeksi 93,5%-dy qurady. Byltyrǵy osy kezeńde bul kórsetkish 104,4% bolǵan.
Jyldyń alǵashqy alty aıynda poshta jáne kýrerlik qyzmetterdiń jalpy kólemi 42,8 mlrd teńgege jetti. Salystyrmaly baǵamen eseptegende bul ótken jyldyń sáıkes kezeńimen salystyrǵanda 6,5%-ǵa tómen.
Aıta keteıik, buǵan deıin Qazaqstanda 28 maýsymnan bastap uıaly baılanys qyzmetterin kórsetý qaǵıdalaryna ózgerister engizilip, operatorlarǵa abonentke kelisiminsiz aqyly qyzmetterdi qosýǵa jáne «maıak» habarlamalaryn jiberýge tyıym salynǵany týraly jazǵanbyz.
