Qazaqstanda mobıldi alaıaqtyqqa qarsy sharalar kúsheıtildi
ASTANA. KAZINFORM — Qazaqstanda azamattardy mobıldi jáne ınternet-alaıaqtyqtan qorǵaýǵa baǵyttalǵan jańa tetikter engizilip jatyr. Qabyldanyp jatqan sharalar baılanys salasyndaǵy qaýipsizdikti arttyryp, alaıaqtyq áreketterdiń aldyn alýǵa múmkindik beredi. Bul týraly Jasandy ıntellekt jáne tsıfrlyq damý mınıstrligi jarııalady.
Negizgi jańashyldyqtardyń biri — uıaly baılanys operatorlarynyń Ulttyq Banktiń Antıfrod-ortalyǵymen turaqty ózara is-qımyly. Bul alaıaqtyq maqsatta paıdalanylatyn telefon nómirlerin der kezinde anyqtap, jedel buǵattaýǵa jol ashady. Kúdikti qońyraýlar men habarlamalar tirkelgen jaǵdaıda, operatorlar abonent týraly málimetterdi Antıfrod-ortalyqqa joldap, tekserý júrgizedi. Alaıaqtyq belgileri rastalsa, nómir birden buǵattalyp, baılanys qyzmeti toqtatylady.
Sonymen qatar abonenttik nómirlerdi rásimdeý tártibi naqtylandy. Bir adamǵa jeke jáne otbasylyq qajettilikter úshin onǵa deıin SIM-kartany tirkeýge múmkindik beriledi. Budan artyq nómirlerdi rásimdeý tek naqty negizdeme bolǵan kezde jáne olardyń qandaı qurylǵylarda paıdalanylatyny kórsetilgen jaǵdaıda júzege asyrylady. Bul sheshim nómirlerdi jappaı tirkeý arqyly jasalatyn alaıaqtyq shemalardyń jolyn kesýge baǵyttalǵan.
- Abonentterdi sáıkestendirý talaptary da kúsheıtiledi. Endi SIM-kartalardy rásimdeý bıometrııalyq sáıkestendirýden ótkennen keıin ǵana múmkin bolady. Bul talap bıznes qurylymdarǵa da qatysty: qyzmettik maqsatta SIM-karta beriletin barlyq qyzmetkerler jeke basyn rastaýy tıis. Mundaı tásil telefon nómirlerin jasyryn paıdalanýdy boldyrmaı, olardyń zańdy ári jaýapty qoldanylýyn qamtamasyz etedi, - delingen aqparatta.
Mindetti bıometrııalyq sáıkestendirý SIM-kartalardyń deldaldar arqyly zańsyz satylý máselesin de sheshýge múmkindik beredi. Nómir qaı jerde satyp alynǵanyna qaramastan, baılanys qyzmeti abonenttiń jeke basy rastalǵannan keıin ǵana iske qosylady.
Jalpy alǵanda, atalǵan sharalar telekommýnıkatsııa salasynda ashyq ári qaýipsiz ortany qalyptastyryp, azamattardy qarjylyq jáne tsıfrlyq alaıaqtyqtan qorǵaýǵa baǵyttalǵan.
Aıta keteıik, BQO-da alaıaqtar dropperler arqyly 17 mln astam teńgeni aýdaryp jibergen.