Qazaqstanda mobıldi «Dáriger» iske qosyldy
ASTANA. 23 qazan. QazAqparat - Búgin Astanada «Dariger» atty elektrondy júıeniń mobıldi nusqasy tanystyryldy. Ony planshet nemese smartfonǵa salyp, kez kelgen aýrý-syrqatty emdeýdiń joldaryn bilýge bolady.
QR Densaýlyq saqtaý mınıstrliginiń departament dırektory Beıbit Esenbaevtyń aıtýynsha, atalǵan mobıldi qosymsha arqyly em-domnyń hattamalaryn alyp, oqýǵa bolady. «Dáriger úshin bul kómekshi sııaqty, ol hattamalardy oqyp, aýrý-syrqatty emdeýdiń joldaryn naqtylaı alady. Al qarapaıym halyq úshin - qazirgi medıtsınalyq qyzmetter týraly tolyqqandy aqparat. Qazaqstannyń kez kelgen azamaty saıtqa kirip, onyń aýrýyn qalaı emdeý qajettigin bile alady», - deıdi B. Esenbaev. Aıta keteıik, «Dariger» atty elektrondy júıeniń mobıldi nusqasy Qazaqstanda jasalǵan. Ázirshe, ony tek Android (2.1-den joǵary) operatsıondy júıesi bar qurylǵylarǵa ǵana kóshirip alýǵa bolady.
