Qazaqstanda mobıldi baılanys operatorlaryna 104 mln teńge aıyppul salyndy

NUR-SULTAN. QazAqparat – Elimizdiń baıaý ınternet pen sapasyz baılanys úshin mobıldi baılanys operatorlaryna 104 mln teńge aıyppul salyndy. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Telekommýnıkatsııa komıteti Radıojelilik spektrin paıdalanýǵa ruqsat berý basqarmasynyń basshysy Erlan Dúısen málim etti, dep habarlaıdy QazAqparat tilshisi.

«Biz osy kezge deıin 465 tekserý júrgizdik. Sonyń nátıjesinde mobıldi baılanys operatorlar jumysynan aqaý tabylyp, olarǵa 104 mln teńgeniń aıyppuly salyndy. Sonymen qatar biz aýyldardy sapaly ınternet jáne baılanyspen qamtý jumysymen aınalysamyz. Jyldam ınternet jáne sapaly baılanyspen qamtý sharasyna qatysty tekserý jumysyn odan ári jalǵastyratyn bolamyz. Eger baılanys operatorlary aqsaı beretin bolsa, onda ákimshilik shara qabyldap, qajet jaǵdaıda qyzmet kórsetý quqyǵynan aıyrý qadamyna deıin baramyz», - dedi Erlan Dúısen.

Óz kezeginde QR Parlamenti Senatynyń depýtaty Edil Mamytbekov telekommýnıkatsııa salasynyń joǵary qarqynmen damyp jatqanyn jetkizdi.

«Memleket basshysy bıylǵy Joldaýynda tsıfrlandyrý salasynyń mańyzdylyǵyna erekshe toqtalyp ótti. Básekelestikti damytamyz desek, jumys sapasyn arttyrýymyz kerek. Sonymen qatar Prezıdent eldimekenderge ınternet tartyp qoımaı onyń sapasyn retteýdi tapsyrdy. Odan bólek, otandyq ІT salasy mamandaryn daıarlaý mindetin de júktedi. Prezıdent tapsyrmasyna sáıkes 100 myń qazaqstandyq ІT mamanyn ázirleý qajet. Telekommýnıkatsııa zamanaýı jyldam damyp jatqan salanyń biri. Osy turǵyda bizde kóshten qalmaýymyz kerek», - deıdi depýtat.

Aıta ketsek, búgin elordada otandyq telekommýnıkatsııa jáne tsıfrlandyrý salasynyń damý barysyna arnalǵan dóńgelek ústel ótti.

Atalǵan sharaǵa quzyrly memlekettik organ ókilderimen qatar sala mamandary qatysty.