Qazaqstanda mindetti tańbalaýǵa qatysty buıryqtyń kúshi joıylýy múmkin
ASTANA. KAZINFORM – Qazaqstannyń Saýda jáne ıntegratsııa mınıstrligi mindetti tańbalaýǵa jatatyn taýarlar tizbesin jáne ony engizý merzimin aıqyndaıtyn buıryqtyń kúshin joıý týraly joba ázirlep, ony qoǵamdyq talqylaýǵa usyndy.
Joba Saýda jáne ıntegratsııa mınıstri mindetin atqarýshynyń 2024 jylǵy 27 qyrkúıektegi №343-NQ «Tańbalaýǵa jatatyn taýarlar tizbesin jáne ony qoldanysqa engizý kúnin aıqyndaý týraly» buıryǵyna qatysty.
Qujatta jańa buıryqty ázirleýge «Quqyqtyq aktiler týraly» Qazaqstan Respýblıkasy Zańynyń 27-baby 1-tarmaǵy negiz bolǵany kórsetilgen. Mınıstrlik bastamasy normatıvtik quqyqtyq bazany qoldanystaǵy zańnamaǵa sáıkestendirýge baǵyttalǵan.
Jobany qoǵamdyq talqylaý 2026 jylǵy 10 maýsymǵa deıin jalǵasady.
Osyǵan deıin Qazaqstanda syrany tańbalaý júıesi qalaı iske asatyny týraly jazdyq.
