Qazaqstanda MIT jasandy ıntellekt ýnıversıtetin ashýy múmkin: Alpaýyt uıymdar nege Azııaǵa bet burdy

ASTANA. KAZINFORM — Álemdegi eń bedeldi tehnologııalyq ýnıversıtetterdiń biri — Massachusetts Institute of Technology Qazaqstanda Jasandy ıntellekt ýnıversıtetin ashýy múmkin. Bul týraly Ǵylym jáne joǵary bilim mınıstri Saıasat Nurbek málim etti.

Mınıstr qazirgi ýaqytta MIT-pen kelissózder bastalyp ketkenin aıtty.

— Nege MIT? Nege eń myqty ýnıversıtetter aqyryndap bizge kele bastady? Ózderińizge málim, qazir AQSh-ta joǵary bilim salasynda jaǵdaı óte qıyn. Prezıdent ákimshiligi úlken ýnıversıtetterdi qarjylandyrý jaǵynan qatty qysyp jatyr. Garvard, Kolýmbııa ýnıversıtetteri de óte qıyn jaǵdaıda. Sondyqtan aqyryndap alpaýyt ýnıversıtetter bizge bet bura bastady. Qazir Prezıdentimizdiń jasandy ıntellekt ýnıversıtetin ashý jóninde úlken tapsyrmasy bar. Bálkim sol ýnıversıtet MIT-pen seriktestik negizinde ashylyp qalady, — dedi Saıasat Nurbek Májilis kýlýarynda.

Massachusetts Institute of Technology 1861 jyly AQSh-tyń Massachýsets shtatynda qurylǵan. Bul oqý orny ınjenerııa, ІT, jasandy ıntellekt, ekonomıka, menedjment baǵyttary boıynsha álemde kósh bastap tur.

Júzden astam Nobel syılyǵynyń laýreaty MIT-pen baılanysty jáne Google, Intel, Dropbox, Bose sııaqty kompanııalar MIT ekojúıesinen shyqqan. Álemdegi eń qýatty jasandy ıntellekt zerthanalarynyń biri — MIT CSAIL osy Massachýsets tehnologııa ınstıtýtynda ashylǵan.

Buǵan deıin Ǵylym mınıstri Azııa elderinen kelgen stýdentter sany TMD stýdentterinen asyp túskenin aıtqan edi.

Endi Qazaqstanda berilgen dıplomdar Azııa-Tynyq muhıty elderinde tanylatyn boldy. Májilis depýtattary Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn ratıfıkatsııalady.