Qazaqstanda myńnan astam shetel azamaty jazasyn ótep jatyr

ASTANA. KAZINFORM – Qazir elimizdegi túzeý mekemelerinde jazasyn ótep jatqan sheteldikterdiń kóbi TMD elderiniń azamattary. Bul týraly QR Bas prokýrorynyń orynbasary Ǵalymjan Qoıgeldıev málim etti.

Búgin Senattyń jalpy otyrysynda depýtat Marat Qojaev qazir elimizde jazasyn ótep jatqan shetel azamattary týraly surady.

Óz kezeginde Ǵ. Qoıgeldıev Qazaqstannyń túzeý mekemelerinde 1085 shetel azamaty jazasyn ótep jatqanyn aıtty.

«Onyń basym bóligi TMD elderinen kelgender. Sonyń arasynda Ózbekstannyń - 527 azamaty, Reseıdiń – 214 azamaty, sondaı-aq Qyrǵyzstan, Tájikstan, Ázerbaıjan azamattary bar. Qazirgi kezde 1998 jylǵy Máskeý konventsııasy aıasynda TMD memleketterimen sottalǵan adamdardy berýge qatysty jumysty atqaryp jatyrmyz», - dedi Bas prokýrordyń orynbasary.

Bul turǵyda ol byltyr depýtattardyń qoldaýymen Ózbekstanmen ekijaqty shart ratıfıkatsııalanǵanyn eske saldy. Jalpy, Qazaqstan shetelmen osyndaı 24 kelisimshart bekitken.

«Qazaqstannyń túzeý mekemelerinde Vetnamnyń azamattary jazasyn ótegen joq. Sondaı-aq Qazaqstan azamattary da Vetnamda sottalǵan joq», - dep naqtylady Ǵalymjan Qoıgeldıev.

Budan buryn habarlanǵandaı, búgin Senattyń jalpy otyrysynda «Qazaqstan Respýblıkasy men Vetnam Sotsıalıstik Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» Zańy maquldandy.