Qazaqstanda mınıstrlik qyzmetkerleri jańa formatta biliktilikterin jetildirýde
Mınıstrliktiń málimetterine qaraǵanda, Development Day - memlekettik qyzmetshilerdi standartty emes formatta oqytýdyń jańa tásili. Atalǵan ádis boıynsha oqytýdy apta saıyn ótkizý týraly sheshim qabyldandy. Árbir is-shara qyzmetkerlerdiń jeke qasıetterin damytýǵa, jańa qyrlaryn anyqtaýǵa, sondaı-aq ınnovatsııalardy damytý, aqparattyq qaýipsizdik, tsıfrlyq saýattylyq jáne t. b. salalarda olardyń quzyrettiligin arttyrýǵa baǵyttalady. Alǵashqy kezdesýge QR Prezıdenti janyndaǵy Memlekettik basqarý Akademııasynyń rektory Altaır Ahmetov bastaǵan Akademııa ókilderi de qatysty.
Jobanyń mańyzdy mindeti – qyzmetkerlerdi júıeli túrde oqyta otyryp, ýaqytyn tıimdi únemdeýge, aldyna mańyzdy mindetter qoıýǵa jáne olardy oryndaý kezinde basymdyqtardy aıqyndaýǵa úıretý. Kásibı koýcherler men mınıstrliktiń sarapshylary qoldanatyn ádister qyzmetkerdiń tıimdilik kórsetkishiniń sandyq jáne sapalyq jaǵynan ósýine qol jetkizýge kómektespek.
Mınıstrliktiń aldynda qoıǵan mindetterge oraı, qyzmetkerlerdi oqytýdyń jańa ádisterin engizý qajettiligi týyndaǵan bolatyn.
QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev atap ótkendeı, qyzmetkerlerdiń biliktiligin arttyrý, olardyń jańa daǵdylardy ıgerip, iskerligin shyńdaý, jeke maqsattary men ujymdyq damý strategııalaryn úılestirý árbir qyzmetkerdiń jáne mınıstrlik jumysynyń tıimdiligin arttyrýǵa yqpal etpek.
«Mınıstrlik - bul protsesteri men qurylymy naqty reglamenttelgen memlekettik organ ǵana emes, bul, birinshi kezekte, ınnovatsııalar men digital-trendterdi engizýge qabiletti, sondaı-aq jańa ıdeıalar men jobalardy júrgizýge umtylatyn mamandar. Jáne de biz jańasha oılaýǵa, erekshe áreket etýge tıispiz. Bul úshin bizdiń qyzmetkerlerdiń aqparat aǵyny men tereń bilimdi turaqty túrde alyp otyrýy mańyzdy. «Development Day» formaty jaqyn arada aıtarlyqtaı nátıje beretinine senimdimin», - dep atap ótti Asqar Jumaǵalıev kezdesý barysynda.
QR Prezıdenti janyndaǵy Memlekettik basqarý akademııasy da oqytýdyń jańa formaty oń nátıje beredi degen kózqarasta.
«QR Tsıfrlyq damý, ınnovatsııalar jáne aeroǵarysh ónerkásibi mınıstrligi - qyzmetkerlerdiń bilikti jattyqtyrýshylarmen jáne sarapshylarmen ózara is-qımylynyń jańa formatyn engizgen alǵashqy memlekettik organdardyń biri. Sonymen qatar, belgili bir kásibı taqyrypty egjeı-tegjeıli taldap, mamandyǵynyń qyr-syryn úıretý úshin spıkerlerdi syrttan shyqyryp qana qoımaı, mınıstrliktiń qyzmetkerlerin tartýǵa bolady. Sondyqtan mundaı oqytýlar bir rettik semınarlar men kýrstarǵa qaraǵanda áldeqaıda tereńirek bilim beretin protsess. Bul akademııa mıssııasymen kelisiletin uzaq protsess, óıtkeni biz eldiń memlekettik apparatyn kásibılendirýge baǵyt ustap otyrmyz. Al mundaı is-sharalar atalǵan protsesti jedeldetýge múmkindik beredi. Sondyqtan, barlyq memlekettik organdarǵa osy tájirıbeni engizýdi usynamyz», - dedi sessııa aıasynda óz pikirimen bólisken Akademııa rektory Altaır Ahmetov.
Jańa formattaǵy oqytý sharasyna jumystan tys ýaqytta barlyq nıet bildirýshiler qatysa alady. Jobanyń negizgi maqsaty – mınıstrlik qyzmetkerleriniń kásibı jáne jeke quzyretin arttyrý.