Qazaqstanda mıneraldy resýrstardyń derekqory qurylady

ASTANA. QazAqparat - QR Indýstrııa jáne ınfraqurylymdyq damý mınıstri Jeńis Qasymbek mıneraldy resýrtardyń derekqoryn qurýdyń tıimdiligin túsindirdi, dep xabarlaıdy QazAqparat tilshisi.

Mınıstrdiń aıtýynsha, búginde «Qazgeologııa» AQ-symen birlese otyryp, «Qazaqstan Respýblıkasynyń mıneraldy resýrstarynyń ulttyq derekqor banki» aqparattyq júıesin qurýǵa arnalǵan joba qolǵa alyndy. Atalǵan júıe biryńǵaı derekter qoryna geologııalyq esepterdi, paıdaly qazbalar qorynyń balanstaryn, ken oryndarynyń pasporttaryn, aýmaqtyń zerttelýi týraly derekterdi jáne ózge de geologııalyq aqparatty jınaýǵa múmkindik beredi. Al «bir tereze» qaǵıdaty jer qoınaýyn paıdalaný úderisterin jeńildetedi.

«Jobany iske asyrýdyń nátıjesinde avtomattandyrylǵan fýnktsııalardyń sany 12-den kem bolmaıdy. Paıdalanýshylardyń jer qoınaýy týraly esepteri, keminde, 3 túrli elektrondy formatta bolady. Budan bólek, keminde, 7 000 jer qoınaýy ýchaskesiniń jáne ken oryndarynyń balanstyq qorlaryn esepteýge múmkindik týady», - dedi J.Qasymbek Úkimettiń búgingi otyrysynda.

Aıta keteıik, otyrysta mınıstr E-SHANYRAQ jobasy aıasynda únemdelgen qarajattyń somasyn atady. J.Qasymbek 4 protsenttik avtonesıe baǵdarlamasyna qosymsha qarjy bólý týraly qaýlyny da tanystyrdy. Budan bólek, Turǵyn úı qurylys jınaq bankiniń «5-20-25» shartymen beriletin ıpotekasyna qosymsha qarjy bólý týraly sheshim qabyldandy.