Qazaqstanda mıllıardtaǵan teńgeniń jobalary iske qosyldy: jańa zaýyttar men aýrýhanalar ashyldy
ASTANA. KAZINFORM — Elimizdiń birqatar oblysynda ónerkásiptik kásiporyndar, medıtsınalyq ortalyqtar, avtomobıl joldary men sport nysandary paıdalanýǵa berildi. Jańa jobalar óńirlerdiń óndiristik jáne áleýmettik ınfraqurylymyn damytýǵa baǵyttalǵan. Bul týraly Úkimettiń baspasóz qyzmeti málim etti.
Elimizdiń óńirlerinde ónerkásiptik áleýetti damytý, kólik, ınjenerlik jáne áleýmettik ınfraqurylymdy jańǵyrtý jumystary jalǵasyp jatyr. Jańa ónerkásip óndiristeri, densaýlyq saqtaý nysandary, jol jelisi jáne áleýmettik sala nysandary paıdalanýǵa berildi.
Kólik ınfraqurylymy
Shyǵys Qazaqstan oblysynda Tereńsaı asýyn aınalyp ótetin avtomobıl joly jáne Pıhtovka ózeni arqyly ótetin Qazaqstandaǵy eń bıik taýly avtomobıl kópiri ashyldy. Jańa nysandar jol qozǵalysy qaýipsizdigin arttyryp, óńirdegi eldi mekender arasyndaǵy kólik qatynasyn jaqsartady.
Almaty oblysynda respýblıkalyq mańyzy bar «Kegen – Narynqol» avtomobıl jolynyń 74 shaqyrymdyq ýchaskesine ortasha jóndeý jumystary aıaqtaldy. Jobanyń quny – 8,1 mlrd teńge. Kún saıyn 1,2 myńnan astam avtokólik qatynaıtyn jańartylǵan jol ýchaskesinde 14 aıaldama, 78 jol qıylysy men kirme jol jóndeldi.
Jetisý oblysynda Muqyry asýyndaǵy uzyndyǵy 21 shaqyrymdyq tórt jolaqty avtojol ashyldy. Jańa jol qozǵalys qaýipsizdigin arttyryp, jol júrý ýaqytyn qysqartýǵa múmkindik beredi.
Ónerkásip jáne óndiris
Almaty oblysynda 2,5 mlrd teńge ınvestıtsııa tartylǵan, táýligine 10 tonna et óńdeýge qaýqarly et óńdeý kásiporny iske qosyldy. Joba óńdeý ónerkásibin damytýǵa jáne ishki naryqtaǵy otandyq ónim kólemin arttyrýǵa baǵyttalǵan.
Túrkistan oblysynda quny 1,5 mlrd teńgeni quraıtyn ónerkásiptik metall konstrýktsııalar men metall buıymdaryn óndiretin zaýyt iske qosyldy. Kásiporyn jylyna 100 dana ónim shyǵarýǵa qaýqarly. Jańa óndiris orny óńirdegi ónerkásip óndirisiniń aýqymyn keńeıtýge múmkindik beredi.
Abaı oblysynda quny 8,4 mlrd teńgeni quraıtyn ósimdik maıyn quıý jáne qaptaý tsehy iske qosyldy. Kásiporyn táýligine 200 tonna maı óndirýge qaýqarly. Jańa tsehtyń iske qosylýy 100-den astam jumys ornyn ashýǵa jáne ishki jáne syrtqy naryqtarda ónim jetkizý kólemin keńeıtýge múmkindik beredi.
Qaraǵandy oblysynda 20,5 myń qusqa arnalǵan, jasandy ıntellekt negizindegi klımatty baqylaý júıesimen jabdyqtalǵan qus sharýashylyǵy kesheni iske qosyldy. Kásiporyn qus etiniń óndirisin jylyna 250–280 tonnaǵa arttyrýǵa múmkindik beredi.
Densaýlyq saqtaý jáne áleýmettik nysandar
Almaty oblysynyń Narynqol aýylynda aýysymyna 250 adamǵa kómek kórsete alatyn, kúndizgi statsıonary jáne zamanaýı dıagnostıkalyq jabdyqtary bar emhana ashyldy.
Óskemen qalasynda Shyǵys Qazaqstan, Abaı jáne Pavlodar oblystarynyń turǵyndaryna arnalǵan 148 oryndyq Gematologııa ortalyǵy salyndy. Nysan qurylysyna, onyń ishinde memleketke qaıtarylǵan aktıvter qarajaty esebinen 33,6 mlrd teńge baǵyttaldy.
Túrkistan oblysynyń Saryaǵash aýdanynda shaǵyn fýtbol, voleıbol jáne basketbol alańdary, sondaı-aq vorkaýt-aımaqtary bar jańa sport jáne balalar oıyn alańdary ashyldy. Jańa nysandar aýyl turǵyndarynyń sportpen shuǵyldanýyna jáne belsendi demalýyna qolaıly jaǵdaı jasaıdy.
Qostanaıda 1000 oryndyq trıbýnalary, júgirý joldary men fýtbol, basketbol jáne voleıbol alańdary bar kópfýnktsıonaldy stadıon (2,9 ga) ashyldy.
