Qazaqstanda mıllıarderler qatary taǵy bir adamǵa tolyqty
ASTANA. KAZINFORM – 6 qarashada Jasandy ıntellekt jáne tsıfrlyq damý mınıstri Jaslan Mádıev osyndaı málimdeme jasady.
Mınıstr Facebook paraqshasyndaǵy jazbasynda, Higgsfield kompanııasynyń negizin qalaýshylardyń biri Aleks Mashrabovqa Qazaqstan azamatynyń pasportyn tabystaǵanyn jazǵan.
— Higgsfield kompanııasynyń teń quryltaıshysy Aleks Mashrabovqa Qazaqstan azamatynyń tólqujatyn qýana tabystadym. Bıylǵy 30 qazanda Memleket basshysy Qasym-Jomart Kemeluly Toqaev tıisti Jarlyqqa qol qoıdy. Osy mańyzdy oqıǵamen quttyqtaımyn.
Prezıdent jasandy ıntellektini damytýǵa jáne talanttardy qoldaýǵa erekshe mán beredi. Biz bolashaq tehnologııalaryn jasaıtyn mamandardyń óz josparlaryn Qazaqstanmen baılanystyryp, ıdeıalaryn júzege asyrýǵa qajetti múmkindikterdi elimizden tapqanyn qalaımyz, — dep jazdy mınıstr.
Jaslan Mádıevtiń aıtýynsha, Qazaqstan bolashaq tehnologııalaryn jasap júrgen adamdardyń óz josparlaryn elimizben baılanystyryp, osynda óz ıdeıalaryn júzege asyrýǵa múmkindik tapqanyn qalaıdy.
— Sizderdiń tabystaryńyz — jastarymyz úshin jarqyn úlgi. Bul Qazaqstanda eńbek ete otyryp, álemdik deńgeıdegi tehnologııalar jasaýǵa, jetekshi kompanııalarmen básekege túsip, halyqaralyq naryqtardy baǵyndyrýǵa bolatynyn kórsetedi.
Aleks, Qazaqstanǵa senim bildirip, elimizdiń azamaty bolýdy tańdaǵanyńyz úshin raqmet. Birlese talanttardy qoldap, jańa ónimder jasap, Qazaqstannyń tehnologııalyq áleýetin nyǵaıtamyz dep senemin. Qazaqstan azamattyǵyn alýyńyzben quttyqtaımyn, Aleks, — dedi Jaslan Mádıev.
Aıta ketelik Prezıdent Higgsfield AI jáne MA7 Ventures ókilderimen jasandy ıntellektini damytý máselesin talqylaǵan edi.
