Qazaqstanda mıkrokredıt boıynsha artyq tólemniń shekti mólsheri bekitilmek
«Osy jyly saqtandyrý naryǵyn jáne baǵaly qaǵazdar naryǵyn retteý men damytý, bank qyzmeti máseleleri boıynsha zań jobasy aıasynda 50 AEK-ke deıingi mıkrokredıt boıynsha artyq tólemniń shekti mólsherin 2 ese – mıkrokredıt somasynyń 100 paıyzynan 50 paıyzǵa deıin tómendetý kózdelgen. Osylaısha, eger mıkrokredıt 153 150 teńge somasynda berilse, onda artyq tólem 76 575 teńgeni quraıdy», - delingen Nurlan Ábdirahmanovtyń Májilis depýtattarynyń saýalyna bergen jaýabynda.
Onyń atap ótýinshe, 2020 jyldan bastap agenttik mıkroqarjy uıymdary borysh júktemesiniń koeffıtsıentin (budan ári – BJK) mindetti esepteý jónindegi talapty engizdi. Oǵan sáıkes qaryz alýshynyń barlyq kredıtteri boıynsha aı saıynǵy tólemderi onyń aı saıynǵy kiristeriniń 50 paıyzynan aspaýǵa tıis.
2022 jylǵy aqpanda borysh júktemesiniń normatıvtik mánderin saqtaý boıynsha MQU-nyń jaýapkershiligin arttyrý úshin BJK prýdentsııalyq normatıvter jáne saqtalýǵa mindetti normalar men lımıtter tizbesine engizildi. Bul rette árbir qaryz alýshynyń BJK-si týraly aqparatty MQU kredıttik bıýroǵa beretin bolady. Bul jedel monıtorıngteýdi júzege asyrýǵa múmkindik beredi.
«2022 jylǵy aqpanda Agenttik BJK-ny esepteýge qoıylatyn talaptardy kúsheıtti. Máselen, BJK esepteý kezinde paıdalanylatyn qaryz alýshynyń kiristerin aıqyndaýdyń 18 ólshemshartynan qaryz alýshyda turaqty kiristerdiń bolýyn senimdi rastaý bolyp tabylmaıtyn 6 ólshemshart alyp tastaldy, bul jańa tutynýshylyq onlaın mıkrokredıtter berý ósý qarqynyn aıtarlyqtaı tejeýge múmkindik beredi», - dedi ol.
