Qazaqstanda mıkro jáne shaǵyn bıznes úshin salyqtyq ákimshilendirý jeńildeıdi
ASTANA. KAZINFORM - Jańa Salyq kodeksine beıimdelý kezeńinde fıskaldyq júktemeni tómendetý maqsatynda mıkro jáne shaǵyn bıznes úshin salyqtyq ákimshilendirýdi jeńildetý týraly sheshim qabyldandy, dep habarlaıdy QR Qarjy mınıstrliginiń Memleketti kirister komıteti.
2026 jylǵy 1 qańtardan bastap osy sanattaǵy bızneske 2026 jylǵy 1 qańtarǵa deıingi kezeńder boıynsha salyqtyq ákimshilendirýdiń jekelegen máseleleri boıynsha jeńildikter engiziledi.
Engiziletin qoldaý sharalary:
Ótken jyldardaǵy salyqtar boıynsha salyqtyq tekserýler sany azaıady:
- kameraldyq tekserýler (eseptilikti avtomatty túrde tekserý) júrgizilmeıdi;
- atalǵan kezeńder boıynsha salyqtyq tekserýler taǵaıyndalmaıdy.
Bul sharalar 2025 jylǵy 17 jeltoqsannan keıin usynylǵan salyqtyq eseptilikke (ıaǵnı qosymsha eseptilikterge, 2025 jyldyń IV toqsany men II jartyjyldyǵy úshin tapsyrylatyn kezekti eseptilikterge), beırezıdentterge qatysty mindettemelerge, qylmystyq ister men prokýratýra organdarynyń talaptary bolǵan jaǵdaıda, sondaı-aq kásipkerdiń óziniń shaǵymy negizinde júrgiziletin tekserýlerge qoldanylmaıtynyn bilý mańyzdy.
Sotqa:
- 2026 jylǵa deıin mıkro jáne shaǵyn bıznes arasynda jasalǵan mámilelerdi jaramsyz dep taný týraly talap-aryzdar berý boıynsha;
- 2026 jylǵa deıin júrgizilgen bıznesti tirkeý nemese qaıta tirkeýdi jaramsyz dep taný týraly talap-aryzdar berý boıynsha júginý toqtatylady.
Ońaılatylǵan taratý.
Salyq tóleýshiler úshin qyzmetti jeńildetilgen tártippen toqtatý (2026 jylǵy 1 qańtarǵa deıingi salyqtyq kezeńder boıynsha) kameraldyq baqylaýsyz júzege asyrylady.
Ósimpuldar men aıyppuldardy esepten shyǵarý.
Eger mıkro nemese shaǵyn bıznes sýbektisi 2026 jylǵy 1 qańtardaǵy jaǵdaı boıynsha esepte turǵan salyqtyq bereshekti (negizgi qaryzdy) 2026 jylǵy 1 qańtar men 31 naýryz aralyǵynda tolyq ótese, onda oǵan:
- atalǵan bereshek boıynsha eseptelgen barlyq ósimpuldar;
- 2026 jylǵy 1 qańtardaǵy jaǵdaı boıynsha eseptelgen salyqtyq aıyppuldar;
- buryn tóleý merzimderi ózgertilgen salyqtar men tólemder boıynsha (onyń ishinde ońaltý jáne bankrottyq rásimderi sheńberinde) eseptelgen ósimpuldar men aıyppuldar, 2026 jylǵy 1 sáýirge deıin mindettemeler tolyq oryndalǵan jaǵdaıda, esepten shyǵarylady.
Muny bilý mańyzdy: keshirim tek ósimpuldar men aıyppuldarǵa ǵana qatysty — negizgi salyq somasy tolyq tólenýi tıis.
Ákimshilik jaýapkershilik.
Mıkro jáne shaǵyn bıznes 2026 jylǵy 1 qańtarǵa deıin jasalǵan aınalymdar úshin mindetti túrde QQS boıynsha esepke qoımaǵany úshin 2026 jylǵy 1 qańtarǵa deıingi kezeńde salyqtyq eseptilikti tapsyrmaǵany úshin ákimshilik jaýapkershilikke tartylmaıdy.
Kásipkerler ótken kezeńder úshin tekserýlersiz bıznesti alańsyz júrgize alady, sebebi ákimshilik jáne qarjylyq júkteme tómendeıdi, nátıjesinde atalǵan sanattaǵylar salyqtyq daýlarǵa emes, bıznesti damytýǵa jáne jańa kezeńdi «taza paraqtan» bastap aǵymdaǵy protsesterdi túzeı alady.
Qazirgi ýaqytta «Kameraldy baqylaýsyz lıkvıdatsııa jáne qyzmetti toqtatý, sondaı-aq ósimpuldar men aıyppuldardy keshirý» erejeleri ázirlenip jatyr jáne ashyq NQA portalynda jarııalanatyn bolady.
Osy sharalardyń negizgi maqsaty — mıkro jáne shaǵyn bıznesti qoldaý, júrgizilip jatqan reformalarǵa beıimdelý kezeńinde kómek kórsetý.
Erjan Birjanov jeke kásipkerlerdiń jappaı jabylatyndyǵyna qatysty aqparatty teriske shyǵardy.