Qazaqstanda mıgranttar eshqandaı qysym kórip otyrǵan joq jáne elde olarǵa qajetti jaǵdaılardyń barlyǵy jasalǵan

Bul týraly búgin Astanda ótip jatqan EQYU Sammıtiniń Sholý konferentsııasynda QR Prezıdenti janyndaǵy Adam quqyqtary jónindegi komıssııa hatshysy Tastemir Ábishev málim etti.

Onyń sózine qaraǵanda, búginde saıası júıesi turaqty, ekonomıkasy qarqyndy damyp kele jatqan, ultaralyq, konfessııaaralyq birlik pen tózimdilik saltanat quryp otyrǵan Qazaqstanǵa syrttan kelýshiler sany bir tolastaǵan emes. «Elimizdegi sheteldikterdiń quqyqtyq jaǵdaıy halyqaralyq qujattar negizinde retteledi. Qazaqstan adam quqyqtaryn qorǵaýdyń ulttyq josparyna sáıkes, 2009 jyldyń 31-shi jeltoqsanynda «TMD elderiniń eńbek mıgranttaryn jáne olardyń otbasylaryn qorǵaý týraly» konventsııany ratıfıkatsııalap bekitti. Atalmysh qujat elge zańdy túrde kelgen mıgranttar men olardyń otbasylaryn quqyqtyq jaǵynan qorǵaıdy jáne olarǵa Qazaqstan azamattaryna beriletin barlyq quqyqtardy berýge yqpal ete alady», dedi T.Ábishev.

Sondaı-aq onyń sózinshe, qazaq halqy elde jumys isteıtin mıgranttarǵa tózimdilikpen qarap, olardy ultyna, dinine nemese basqa da belgilerine qarap bólip, jarmaıdy. «Elimiz BUU-nyń násildik kemsitýshiliktiń barlyq nysandaryn joıý týraly halyqaralyq konventsııasyn bekitken. Bul týraly eki ret Jenevada BUU-nyń komıtetine esep berilip, halyqaralyq uıym sarapshylary elimizdiń bul baǵyttaǵy jumystaryna oń baǵa berdi. Tipti násildik kemsitýshilikti joıý týraly Qazaqstannyń úlgisin ózge elderge taratý qajettigin aıtty», dedi komıssııa hatshysy.

Sondaı-aq ol sózinde Qazaqstanǵa keletin mıgranttardyń tek zańdy túrde ǵana kelý qajettigin, al ózge elde qylmys jasap, boı tasalap kelgen azamattarǵa halyqaralyq qujattar negizinde shara qoldanylatyndyǵyn atap kórsetti.