Qazaqstanda «Meıirimdilik aptalyǵy» bastaldy

ASTANA. KAZINFORM — Qazaqstanda «Igi ister marafony» respýblıkalyq jobasy aıasynda 20-26 sáýir aralyǵynda ótetin «Meıirimdilik aptalyǵy» bastaý aldy, dep habarlaıdy Mádenıet jáne aqparat mınıstrliginiń baspasóz qyzmeti.

Vedomstvo málimetinshe, bastama volonterlik pen qaıyrymdylyq mádenıetin damytýǵa baǵyttalǵan.

— Bir apta boıy el kóleminde memlekettik organdar, bilim berý jáne medıtsınalyq mekemeler, úkimettik emes uıymdar men volonterlerdiń qatysýymen túrli ıgi is-sharalar men aktsııalar ótkiziledi. Ásirese, áleýmettik turǵydan osal toptarǵa qoldaý kórsetýge, janýarlarǵa jaýapkershilikpen qaraýǵa jáne qorshaǵan ortany qorǵaýǵa basa mán beriledi, — delingen habarlamada.

Joba qazaqstandyqtardy ıgi isterge jumyldyryp, qoǵamdaǵy birlikti nyǵaıtýdy, qaıyrymdylyq pen adamgershilik qundylyqtaryn keńinen dáripteýdi kózdeıdi. Respýblıka boıynsha is-sharalarǵa myńdaǵan adam qatyspaq.

«Kishkentaı qadam — úlken ózgeris!» uranymen júzege asyp jatqan bastama ár adamnyń úlesi mańyzdy ekenin aıqyndaıdy.

Aktsııaǵa kez kelgen adam áleýmettik jelilerde óz ıgi isterimen bólisip, #IgiІsterMarafony2026, #MarafonDobryhDel2026 jáne #MarathonOfGoodDeeds2026 heshtegterin belgileý arqyly qosyla alady.

Osydan buryn Qazaqstanda eriktilerge arnalǵan «Meıirim» ordeni paıda bolǵanyn jazǵanbyz.