Qazaqstanda meıramhana bıznesi qalaı damyp jatyr

ASTANA. KAZINFORM – Bıylǵy toǵyz aıdyń qorytyndysy boıynsha elimizde 55 jańa meıramhana paıdalanýǵa berildi. Bul – sońǵy jeti jyldaǵy eń joǵary kórsetkish, dep habarlaıdy Ulttyq statıstıka bıýrosy.

Ótken jylmen salystyrǵanda ósim 1,8 esege artqan. Mundaı serpin atalǵan kezeń ishindegi eń aıqyn kórsetkish bolyp otyr.

Al jalpy engizilgen oryndar sany boıynsha derekter on jylǵa deıingi aralyqty qamtıdy. 2025 jyldyń qańtar-qyrkúıek aılarynda bul kórsetkish 16,2 myń orynǵa jetken, bul 2018 jyldan bergi eń joǵary deńgeı (sol jyly – 19,4 myń oryn bolǵan).

Alaıda bir meıramhanaǵa shaqqandaǵy ortasha oryn sanyn esepteý múmkin emes, sebebi meıramhanalar statıstıkasyna tek jańadan salynǵan nysandar engizilse, al oryn sanynyń esebine rekonstrýktsııalanǵan nysandar da kiredi.

Sonymen birge, bir orynnyń ortasha qunyn anyqtaýǵa bolady.

Ulttyq statıstıka bıýrosynyń málimetinshe, qańtar-qyrkúıek aılarynda engizilgen meıramhanalardyń jalpy quny shamamen 57 mlrd teńgeni qurady. Bul – ótken jylmen salystyrǵanda 2,7 ese kóp. Osylaısha, bir orynnyń ortasha quny 3,5 mln teńgege teń (jyldyq ósim – 46%).

Jańa meıramhanalardyń aımaqtar boıynsha úlesi birkelki emes.

Kósh basynda Túrkistan oblysy tur – eldegi barlyq jańa meıramhanalardyń 40%-y nemese 23 nysan osy óńirde ashylǵan. Odan keıingi orynda Qyzylorda oblysy (7 nysan), úshinshi orynda Atyraý oblysy (5 nysan) ornalasqan.

Astanada bıyl bar bolǵany bir meıramhana paıdalanýǵa berildi, biraq munda bir orynnyń ortasha quny eń joǵary – 12,3 mln teńge. Nysan 200 orynǵa eseptelgen.

Al Almaty qalasy boıynsha resmı statıstıka jańa meıramhana ashylǵanyn tirkemegen.

Aıta keterligi, elde kafe sany da rekordtyq deńgeıge jetken. Toǵyz aıda 68 jańa kafe ashylyp, bul sońǵy alty jyldaǵy eń joǵary kórsetkish boldy. Barlyǵy 4,9 myń oryn paıdalanýǵa berilip, olardyń jalpy quny 11,7 mlrd teńgeni qurady.

2025 jyldyń basyndaǵy resmı málimetke sáıkes, Qazaqstanda 2,4 myń meıramhana (339,1 myń oryn) jáne 5,2 myń kafe (293,4 myń oryn) jumys isteıdi.

Meıramhanalar men kafelerdi paıdalanýǵa berý týraly statıstıkalyq esepterdi zańdy tulǵalar tikeleı Ulttyq statıstıka bıýrosyna tapsyrady, al jeke tulǵalar jergilikti atqarýshy organdar arqyly esep beredi. Barlyq derekter nysandy paıdalanýǵa qabyldaý aktileriniń negizinde jınaqtalady.

Aıta keteıik, Qazaqstanda jyl basynan beri 266 mınımarket pen 90 sýpermarket ashyldy.