Qazaqstanda metall synyqtary men qaldyqtaryn áketýge tyıym salý ýaqyty uzartyldy
ASTANA. KAZINFORM – Ónerkásip jáne qurylys mınıstri tıisti buıryqqa qol qoıdy.
2025 jylǵy 30 qazannan bastap alty aı merzimge el aýmaǵynan barlyq kólik túrimen qara jáne tústi metaldardyń qaldyqtary men synyqtaryn, onyń ishinde mys, alıýmınıı, qorǵasyn, sondaı-aq qorǵasyn akkýmýlıatorlary men olardyń quramdas bólikterin áketýge shekteý engiziledi.
Tyıym paıdalanylǵan qubyrlar, relster, shpaldar jáne temirjol tósemi men jyljymaly quramnyń ózge de elementterine de qatysty bolyp otyr.
Buıryqta atalǵan shara «Saýda qyzmetin retteý týraly» jáne «Qazaqstan Respýblıkasynyń ulttyq qaýipsizdigi týraly» zańyna, sondaı-aq Eýrazııalyq ekonomıkalyq odaq týraly shartqa sáıkes qabyldanǵany atalǵan.
Syrtqy ekonomıkalyq qyzmetke qatysýshylar, ıaǵnı temirjol elementterin jóndeý úshin taýarlardy áketetin tulǵalar, tasymaldaýǵa deıin keminde bes jumys kúni buryn salalyq mınıstrliktiń Ónerkásip komıtetine kelisimsharttardy, deklaratsııalardy jáne oryndalǵan jumystar aktilerin usynýy tıis.
Óz kezeginde vedomstvo Memlekettik kirister komıtetin josparlanǵan jetkizilimder týraly habardar etedi.
Qujat bıyl 30 qazannan bastap kúshine enedi.
Aıta ketsek, osy kúzde otandyq metallýrgııa óndirisine jasandy ıntellektini engizý boıynsha aýqymdy joba bastaldy.