Qazaqstanda merzimdi áskerı qyzmetshilerge nesıe tóleýdi keıinge qaldyrý ýaqyty uzartylady
ASTANA. KAZINFORM – QR Senatynyń depýtaty Sergeı Karplıýk merzimdi áskerı qyzmetshiler úshin nesıeni óteý talaptaryn jeńildetýge baǵyttalǵan jańashyldyqty jarııalady.
Atap aıtqanda, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kredıt berý kezinde táýekelderdi barynsha azaıtý, qaryz alýshylardyń quqyqtaryn qorǵaý, qarjy naryǵyn retteý jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaraldy.
Qujatta merzimdi áskerı qyzmetti ótkerý kezeńinde qaryz alýshyǵa kredıtter boıynsha tólemderdi keıinge qaldyrý qarastyrylǵan.
Sonymen qatar Senat depýtattary zapasqa jańadan bosatylǵan áskerı qyzmetshige jumysqa ornalasý jáne tólem qabilettiligin qalpyna keltirý úshin qosymsha ýaqyt berý normasyn engizdi. Bul turǵyda Zań aıasynda merzimdi áskerı qyzmetti ótkerý kezeńine qaryzdy óteý boıynsha merzimin keıinge qaldyrý qosymsha 60 kúnge uzartylmaq.
«Bankter men mıkroqarjy uıymdary olarǵa talap qoımaýy úshin merzimdi áskerı qyzmettegi boryshyn ótep kelgenderge 60 kún ýaqyt qostyq. Bul qadam áskerden kelgenderge bank uıymdary birden qaryzdy óteýdi talap etpes úshin jasaldy. 60 kún merzim áskerı boryshyn ótegen jastarǵa jumysqa ornalasyp, tólem qabiletin qalpyna keltirýge múmkindik beredi», - dedi depýtat.
