Qazaqstanda merziminen buryn saılaýlar bolmaıdy - Q.Turǵanqulov
ASTANA. 4 qarasha. QazAqparat /Gúlmıra Álıakparova/ - Qazaqstanda merziminen buryn saılaýlar bolmaıdy. Bul týraly búgin Eýropalyq Parlamenttiń sotsıal-demokrattar delegatsııasymen kezdesýi barysynda jýrnalısterge bergen suhbatynda QR Ortalyq saılaý komıssııasynyń tóraǵasy Qýandyq Turǵanqulov málim etti.
Q.Turǵanqulov atap kórsetkendeı, qazir júrip jatqan qaýesetterge qaramastan, Qazaqstanda merziminen buryn saılaýlar bolmaıdy. «Biz elektoraldyq naýqandardy ótkizýge tek Konstıtýtsııaǵa jáne Konstıtýtsııada kórsetilgen merzimderge baǵdar jasaımyz, olar - 2011 jáne 2012 jyldar», - dedi ol.
Sondaı-aq ol, 2012 jyly ótýi tıis QR Parlamenti Májilisi men máslıhat depýtattarynyń, sondaı-aq QR Prezıdentiniń saılaý merzimderi biriktirilmeıtindigin atap ótti. Sebebi, olardy bir jylda ótkizýge Qazaqstannyń zańnamasy kedergi keltirmeıdi.
Ortalyq saılaý komıssııasynyń tóraǵasy sonymen birge, 2012 jylǵy saılaýlarǵa, onyń ishinde Prezıdenttik saılaýǵa arnalǵan qandaı da bir sharalar áli bastalmaǵandyǵyn atap ótti. Al prezıdenttikke úmitker kandıdattardy tirkeý, tıisti organdarmen saılaý ýaqyty belgilengennen keıin júrgizile bastaıdy. Qazir OSK tek saılaýshylardyń tizimin jasaqtaýmen, barlyq saılaý komıssııalardyń turaqty jumysyn qamtamasyz etýmen, saılaýshylar men saılaý komıssııalary múshelerine Saılaý zańnamalaryn túsindirýmen aınalysýda.
Q.Turǵanqulovtyń aıtýynsha, aldaǵy ýaqytta «Saılaý týraly» QR Zańyna keıbir ózgerister men tolyqtyrýlardy da engizý qarastyrylyp otyr.
