Qazaqstanda «Mereıli otbasy» ulttyq konkýrsy bastaldy
ASTANA.KAZINFORM - Mádenıet jáne aqparat mınıstrligi jyl saıyn ótetin «Mereıli otbasy» ulttyq konkýrsyna qatysýǵa ótinim qabyldaý bastalǵanyn habarlady.
Baıqaý adamgershilik qasıetterdi jandandyrýǵa, otbasy mártebesi men qundylyqtaryn arttyrýǵa baǵyttalǵan.
Eńbek pen sportta, shyǵarmashylyq jáne zııatkerlik salalarda, ǵylym men ónerde jetistikteri bar otbasylar, sondaı-aq qoǵamdyq paıdaly qyzmetke belsendi aralasatyn otbasylar qatysa alady.
Konkýrsqa qatysýǵa ótinimder 15 mamyrdan 15 maýsymǵa deıin óńirlik komıssııalarda qabyldanady.
Baıqaý eki kezeńde ótedi:
1. Aýdandyq (qalalyq) kezeń (15 maýsymnan 30 maýsymǵa deıin).
2. Oblystyq (respýblıkalyq mańyzy bar qalalar men elorda) kezeń (30 maýsymnan 15 shildege deıin).
«Mereıli otbasy» ulttyq konkýrsynyń laýreaty ataǵy Qazaqstannyń barlyq óńirinen úzdik dep tanylǵan 20 otbasyna beriledi. Konkýrs laýreattaryn saltanatty marapattaý rásimi Astana qalasynda ótedi.
Osy jyldar ishinde konkýrsqa Qazaqstannyń barlyq óńirinen 20 myńnan astam otbasy qatysty. Bıyl qatysýǵa nıet bildirgender óz ótinimderin óńirlik komıssııalarǵa jibere alady.
Qazaqstandyqtardyń basym bóligi memlekettik merekelerdi otbasymen birge atap ótedi. Mundaı derekti Qazaqstandyq qoǵamdyq damý ınstıtýty júrgizgen áleýmettik saýalnama nátıjesi kórsetkenin jazǵan edik.
