Qazaqstanda merekeden keıingi klınıng qyzmeti qansha
Jańajyldyq basqosýlar aıaqtalyp keledi, ıaǵnı qonaqtarǵa, otbasyna jaıylǵan dastarhan jınaldy. Qazaqstandyqtardyń kóbi qańtar aıynyń alǵashqy kúni-aq úıdi jınaý qyzmetiniń qunyn salystyrady. Muntazdaı etip tazalap beretin klınıng kompanııalardyń usynysyn qaraıdy. Jeńil-jelpi jınap shyǵatyny da, ár buryshyn tazalap beretini de bar. Kazinform tilshisi aımaqtardaǵy klınıng qyzmetiniń baǵasyn salystyrdy.
Jańajyldyq merekeden keıin klınıng kompanııalardyń qyzmetine suranys artady. Mereke aldyndaǵy qarbalas, Jańa jyl túnindegi basqosýdan soń kóp adam sharshap, úıdi jınaýdy óz isiniń sheberlerine tapsyrady. Sóıtip klınıng kompanııalardyń baǵasyn salystyrady. Baǵa óńirlerge jáne jumys kólemine qaraı ózgerip otyrady.
Úı jınaýdyń úsh túri bar
Klınıng kompanııalar úı, keńse jınaýdyń úsh negizgi túrin usynady. Árqaısysynyń jumys kólemi men aqysy ártúrli.
Alǵashqysy úıdi qarapaıym jınap shyǵý. Kópshiligi osy qyzmet túrin tańdaıdy, ıaǵnı úıdi jınap, edenin jýyp, jýyný bólmesi men ájethana ishin tazartý kiredi.
Úı ishin túbegeıli tazartatyn qyzmet túrine esik, tereze jýý, as úı jıhazyn tazartý, bólme ishindegi ár qýysty jınaý kiredi.
Al jóndeý jumystarynan keıin tazartý qyzmeti ádette qymbatqa shyǵady. Sebebi jelim men syrlaý, ákteýden keıin tazartý úshin kóp kúsh pen arnaıy hımııalyq qospalar kerek.
Munaıly ólke men megapolıste baǵa joǵary
Elimiz boıynsha iri qalalar men tabysy joǵary óńirde qyzmet quny qymbat.
Almatyda:
qarapaıym jınaý — 17 myńnan bastalyp 220 myń teńgege deıin;
tolyq tazalaý — 32 myńnan 700 myńǵa deıin;
jóndeýden keıin — 1 mln teńgege deıin.
Astanada:
qarapaıym jınaý qyzmeti — 19-270 myń teńge aralyǵynda;
tolyq tazalaý — 850 myń teńgege deıin;
jóndeýden keıin — 900 myń teńgege deıin.
Atyraý men Shymkentte de baǵa ózge óńirlerge qaraǵanda joǵary. Bul qalalarda úıdi tolyq jınaý quny keıde 500 myń teńgege shyǵady. Al jóndeýden keıin 550-600 myń teńge tóleýge týra keledi. Baǵa suranysqa jáne úı men páterdiń, keńseniń kólemine qaraı óse beredi jáne únemi ózgerip otyrady.
Qyzmet qunynyń baǵasy ortasha qalalar
Bul sanatqa Qaraǵandy, Pavlodar, Óskemen, Semeı, Taraz, Qostanaı men Aqtóbe kiredi. Osy qalalarda jeńil-jelpi jınap, edenin tazartý qyzmetiniń baǵasy orta eseppen 15-25 myń teńgege shyǵady. Al tolyq jınap berse 28-40 myń teńge bolady. Jóndeý jumystarynan soń tazartý qyzmetiniń quny 250-500 myń teńge aralyǵynda.
Máselen Qaraǵandy qalasynda úı nemese páter ishin tolyq tazartyp berse 40-150 myń teńge, jóndeýden keıin 500 myń teńge alady.
Baǵa basqaǵa qaraǵanda tómen qalalar
Óńirler arasynda Kókshetaý, Petropavl, Aqtaý, Oral, Taldyqorǵan, Túrkistan men Jezqazǵanda baǵa tómen.
Bul qalalarda ylǵaldy jınaý qyzmetiniń baǵasy — 10 000 — 20 000 myń teńge. Al tolyq jınaý qyzmetiniń quny — 100 — 150 myń teńge. Sonymen birge bul qalalarda jóndeý jumystarynan keıin klınıng qyzmetine júginseńiz, 150-300 myń teńge alady.
Jańajyldyq merekeden keıin klınıng qyzmetine júginý bul baılyqtyń emes, tez ári artyq kúsh jumsamaı qalypqa kelýdiń bir joly. Qazaqstanda óńirler men jınaıtyn páter, úıdiń aýdanyna, qyzmet túrine qaraı baǵa 10 000 teńgeden bastalyp, mıllıonǵa deıin jetedi. Tutynýshy óz tańdaýyn jasaıdy. Ýaqyt pen aqshany únemdeıdi nemese ekeýin de teń ustap, ortaq ári tıimdi sheshim qabyldaıdy.
Buǵan deıin Aıaz Ata men Aqshaqardy úıge shaqyrý qyzmetiniń quny týraly jazǵanbyz.
Sonymen birge Jańa jyl dastarhanyn jaıýǵa qansha qarjy jumsaıtynymyzdy bildik.