Qazaqstanda menıngıt ekpesin tegin jasaý máselesi qarastyrylýda
«Qazirgi ýaqytta bul vaktsına tegin medıtsınalyq kómektiń kepildik berilgen kólemine enbegen jáne memleket onyń baǵasyn rettemeıdi. Kásipkerler ózderi uıǵarǵan baǵany bekitedi. Bizdiń 6 700 vaktsına jetkizildi jáne olar bólshek saýda naryǵynda medıtsınalyq ortalyqtar men vaktsınalaý kabınetteri arqyly taralýda. Qazir memleket tarapynan tegin vaktsınatsııa júrgizýge qatysty másele talqylanýda. Ol Qoǵamdyq densaýlyq saqtaý komıtetiniń quzyrynda», - dedi Arnur Nurtaev Ortalyq kommýnıkatsııalar qyzmetinde ótken baspasóz máslıhatynda.
Sonymen birge, QR Densaýlyq saqtaý mınıstrligi Farmatsııa komıtetiniń tóraǵasy Lıýdmıla Bıýrabekova Astanadaǵy juqpaly aýrýlar aýrýhanasynyń qajetti preparattarmen tolyq qamtylǵanyn habarlady.
«Aýrý belgileri (menıngıt - avt.) paıda bolyp, dıagnoz qoıylǵan jaǵdaıda naýqastar juqpaly aýrýlar aýrýhanasyna jetkiziledi. Juqpaly aýrýlar aýrýhanasyna qajetti dáriler biryńǵaı dıstrıbıýtor tiziminde bar jáne satyp alynǵan. Jeksenbi kúni ózim Astanadaǵy Balalarǵa arnalǵan juqpaly aýrýlar aýrýhanasyna baryp, preparattardy tekserdim. Barlyq antıbıotıkter bar. Patsıentke qajetti barlyq terapııa tegin medıtsınalyq kómektiń kepildik berilgen kólemi aıasynda memlekettik bıýdjet esebinen qamtamasyz etilgen», - dedi Lıýdmıla Bıýrabekova.