Qazaqstanda memlekettik satypalym júıesi biryńǵaı tsıfrly platformaǵa kóshirildi
ASTANA. KAZINFORM – Qazir memlekettik satypalymnyń barlyq protsesi (josparlaýdan bastap tólemge deıin) www.goszakup.gov.kz veb-portal arqyly elektrondy formatta júzege asyrylyp keledi. Bul barlyq bıznes-protsesti tolyq avtomattandyrýǵa jol ashty.
Qarjy mınıstrligi málimetinshe, elektrondy format barlyq rásimdi qamtıdy: satypalymdy júrgizý, kelisimsharttar jasaý jáne tirkeý, elektrondy bank kepildikterin paıdalaný, taýarlardy jetkizý, jumystardy oryndaý jáne qyzmetterdi kórsetý aktilerin rásimdeý, elektrondy shot-faktýralar jáne tólem shottary.
Veb-portaldyń memlekettik organdardyń aqparat júıelerimen aýqymdy ıntegratsııasy áleýetti ónim berýshilerdiń biliktilik talaptaryna sáıkestigin, salyq jáne sot beresheginiń bar-joqtyǵyn, sondaı-aq josyqsyz ónim berýshiler tiziminen avtomatty túrde tekserýge múmkindik berdi. Bul ashyqtyqty aıtarlyqtaı arttyryp, adamı faktordyń aldyn alýǵa septesti.
Global Data Barometer halyqaralyq zertteýine súıensek, Qazaqstannyń satypalym júıesi qoljetimdilik pen ashyqtyq kórsetkishi jaǵynan álemde 3-shi orynda tur.
2025 jyldyń 1 qańtarynan bastap «Memlekettik satyp alý týraly» Zań kúshine endi. Osy reformaǵa sáıkes satypalymnyń barlyq túrin biriktiretin Biryńǵaı satyp alý platformasyn qurý kózdeldi: memlekettik jáne kvazımemlekettik sektor sýbektileriniń, ulttyq ál-aýqat qorlarynyń, sondaı-aq bilim berý uıymdaryndaǵy tamaqtandyrý máselelerine baılanysty jáne basqa da satypalymdar.
Biryńǵaı satyp alý platformasy «Elektrondyq qarjy ortalyǵy» AQ bazasynda jasalyp, qoldanystaǵy goszakup.gov.kz, zakup.sk.kz jáne mitwork.kz júıelerimen ıntegratsııalandy. Sonymen qatar platforma sot kabıneti, «Qazynashylyq-klıent», boryshkerler tizimi, jyljymaıtyn múlik tizimi, «E-lıtsenzııalaý» júıesi jáne t.b. qosa alǵanda, 20-dan astam memlekettik aqparat júıesimen de biriktirilgenin aıta keteıik.
Biryńǵaı platformanyń iske qosylýy retteletin satypalymnyń barlyq túrine ashyq, jaıly jáne biryńǵaı qoljetimdilikti qamtamasyz etti.
Tyń tetik óndirýshiler arasyndaǵy básekelestik deńgeıin arttyryp, zańsyz praktıkalardyń syn-qaterin azaıtý men bıýdjet qarajatyn neǵurlym tıimdi paıdalanýǵa múmkindik beredi.
Aıta keteıik, memlekettik satyp alý týraly birqatar buıryqqa ózgeris engizildi.
Memlekettik satyp alý týraly zań shaǵymdardy úsh esege azaıtty.
Qurylys salasyndaǵy memlekettik satyp alýdyń erejesi qatańdatylady.