Memlekettik organdarǵa úsh jylǵa ákimshilik ǵımarattar salýǵa tyıym salynady
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın memlekettik organdardyń shyǵysyn qysqartý jospary týraly túsinik berdi.
Onyń aıtýynsha, Prezıdent Ákimshiligi basshysynyń jetekshiligimen tıisti jumys toby qurylyp, túrli salalardaǵy memlekettiń shyǵyndaryn ońtaılandyrý is-sharalary atqarylyp jatyr. Serik Jumanǵarın bıýdjet salasynda shyǵysty ońtaılandyrýmen aınalysatyn kishi topty basqaryp otyr.
— Biz birqatar usynysty daıyndadyq. Jaqyn arada olardy kelisip, iske asyrýdy bastaımyz. Birinshiden, biz vedomstvolyq baǵynysty uıymdardy qysqartamyz, sondaı-aq memlekettik uıymdardyń sanyn kóbeıtýge, jańa qurylystarǵa, ǵımarattarǵa jáne basqa da bastamalarǵa moratorıı engizemiz. Qazir osy jumystar istelip jatyr, — dedi Serik Jumanǵarın Parlament Májilisiniń jalpy otyrysynan keıin tilshiler suraǵyna jaýap bere otyryp.
Onyń sózine qaraǵanda, úsh jylǵa ákimshilik ǵımarattardy salýǵa moratorıı engizý usynyldy. Degenmen, erekshe jaǵdaılar eskerilgen.
— Máselen, Qonaevta ǵımarattar salynyp jatyr. Sebebi jańa nysandar kerek. Bul turǵyda osy qurylystardy jalǵastyramyz. Bastaǵan ǵımarattardy bitirýimiz kerek, óıtkeni jobalardyń quny aldaǵy ýaqytqa ósýi múmkin, — dedi Serik Jumanǵarın.
Budan buryn habarlanǵandaı, 2025 jylǵa arnalǵan jergilikti bıýdjet shyǵystary 19,3 trln teńgege jetti.