Qazaqstanda memlekettik nagradalarǵa usyný tártibine ózgerister engizildi

ASTANA. KAZINFORM – QR Prezıdentiniń ókimimen memlekettik nagradalarǵa usyný jáne olardy tapsyrý tártibin retteıtin nusqaýlyqqa ózgerister men tolyqtyrýlar engizildi, dep habarlaıdy Mádenıet jáne aqparat mınıstrligi.

Ózgerister nagradtaýǵa kandıdattardy qaraý kezinde ashyqtyqty, obektıvtilikti jáne ádildikti qamtamasyz etýge baǵyttalǵan. Jańa redaktsııada qujattardy resimdeý jáne úmitkerlerdiń eńbegin baǵalaý krıterııleri naqtylandy.

Atap aıtqanda, nagradtaý qaǵazynda kandıdattyń eńbek joly, el men halyq aldyndaǵy naqty eńbekteri, sondaı-aq qylmystyq quqyqbuzýshylyqtar týraly málimetter (jasalǵan ýaqytyna qaramastan) mindetti túrde kórsetiledi. Jekelegen jaǵdaılarda ishki ister organdarynan minezdeme talap etiledi.

Kópbalaly analardy nagradtaýǵa qatysty talaptar da retteldi. Endi nagradtaý tek Qazaqstan azamaty bolyp tabylatyn kópbalaly analarǵa beriledi. Eger kópbalaly ananyń ózge eldiń azamattyǵyndaǵy balalary bolsa, olardyń pasporttarynyń kýálandyrylǵan kóshirmeleri men fotosýretteri qosa usynylýy qajet.

Sonymen qatar, nusqaýlyqqa sáıkes memlekettik nagradalardyń kóshirmeleri (dýblıkattary) qymbat baǵaly metaldar qoldanylmaı daıyndalady.

Memlekettik nagradalarǵa quqyqty qalpyna keltirý ýákiletti organdardyń ótinishi negizinde, sot aktileri men ózge de rastaıtyn qujattar usynylǵan jaǵdaıda múmkin bolady.

Qabyldanǵan ózgerister memlekettik nagradalarǵa usyný rásimin júıeleýge jáne osy ınstıtýtqa degen senimdi arttyrýǵa baǵyttalǵan.

Aıta keteıik, buǵan deıin vedomstvolyq nagradalardyń jobalaryn ázirleý qaǵıdalary daıyn bolǵany habarlanǵan bolatyn.