Qazaqstanda memlekettik mektepterde oryn jetkilikti – Oqý-aǵartý mınıstrligi
ASTANA. KAZINFORM – Jekemenshik mektepterdegi oqý aqysynyń qymbattaýy men oqýshylardyń memlekettik mektepterge aýysý yqtımaldyǵyna qatysty Oqý-aǵartý vıtse-mınıstri Jaıyq Sharabasov Ortalyq kommýnıkatsııalar qyzmeti alańynda ótken brıfıngte pikir bildirdi.
Onyń aıtýynsha, oqý aqysynyń ósýine baılanysty ýákiletti organ jergilikti atqarýshy organdarmen birlesip qosymsha sharalardy pysyqtap jatyr.
– Memlekettik bilim berý tapsyrysy aıasynda pedagogterdiń eńbekaqysyn tóleýge, aǵymdaǵy jóndeý jumystaryn júrgizýge jáne qajetti jabdyqtardy satyp alýǵa qarajat qarastyrylǵan. Sondyqtan jekemenshik mekteptermen birlesip, oqý aqysynyń qymbattaýyna qanshalyqty negiz bar ekenin jan-jaqty zerdeleýimiz qajet, – dedi Jaıyq Sharabasov.
Vıtse-mınıstrdiń sózinshe, elimizdiń memlekettik bilim berý júıesinde oqýshylardy mektep oryndarymen qamtamasyz etýge jetkilikti múmkindik bar.
– Sońǵy eki jylda elimizde 217 mektep salyndy. Olardyń kópshiliginde bos oryndar jetkilikti. Sondyqtan synyptardyń shamadan tys tolyp ketý qaýpi joq, – dedi ol.
Aıta keteıik, bıyl 22 jekemenshik mektep lıtsenzııasynan aıyryldy.
Sonymen qatar jekemenshik mektepter sanynyń qarqyndy ósýi birqatar júıeli kemshiliktiń bar ekenin kórsetti.
