Qazaqstanda memlekettik qyzmetshilerge arnalǵan jasandy ıntellekt kýrsy bastaldy

ASTANA. KAZINFORM — Qazaqstanda memlekettik qyzmetshilerge arnalǵan «AI Qyzmet» atty jasandy ıntellekt kýrsy bastaldy. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev málim etti.

— «AI Qyzmet» kýrsyna qosh keldińizder! Búginnen bastap siz jumys barysynda jasandy ıntellektini qalaı tıimdi qoldanýǵa bolatynyn úırenesiz. Bul kýrs jańa tehnologııany túsinýdi ǵana emes, ony naqty áreketke aınaldyrýdyń qadamy. «AI Qyzmet» — Ortalyq Azııada alǵash ret iske qosylǵan arnaıy baǵdarlama. Ol jerde kúrdeli teorııa bolmaıdy, barlyǵy qarapaıym tilmen túsindirilip, naqty mysalmen kórsetiledi, — dedi Jaslan Mádıev.

Mınıstrdiń málimdeýinshe, memlekettik qyzmetshilerge arnalǵan jasandy ıntellekt kýrsy 6 bólimnen turady. 

— Ár bólim naqty bir baǵytqa arnalǵan, mysaly, mátin jazý, derektermen jumys, qujat ázirleý, sóıleýge daıyndalý sekildi tapsyrmalar bolady. Barlyq materıal qysqa ári mazmundy vıdeo arqyly beriledi. Biz qysqa formattaǵy oqytý tásilin qoldanamyz. Bul sizdiń ýaqytyńyzdy únemdeıdi ári aqparatty tez meńgerýge múmkindik beredi. Bir bólimdi meńgerýge shamamen 45 mınýt ýaqyt qajet, kýrs sońynda siz tapsyrmalardy burynǵydan da jyldam ári jeńil oryndaı alasyz. Mátin jazý, esep júrgizý, prezentatsııa jasaý áldeqaıda ońaı bolady. Eń bastysy jasandy ıntellekt quralyn senimdi qoldana alasyz. Bul adamnyń ornyn baspaıdy, jumysty jeńildetip, ýaqytty únemdeıtin qural. Kúndelikti qaıtalanatyn isterdi avtomatty túrde oryndap, mańyzdy máselege kóbirek kóńil bólýge jaǵdaı jasaıdy. Endi jasandy ıntellekt sizdiń kásibı jumysyńyzdyń turaqty serigine aınalady, — deıdi vedomstvo basshysy.

Buǵan deıin elimizde oqýshydan memlekettik qyzmetshige deıin jasandy ıntellektini meńgeretinin jáne onyń mańyzy týraly jazǵan edik. 

Aıta keteıik, Tsıfrlyq mınıstrligi aldaǵy bes jylda 1 mln-ǵa jýyq qazaqstandyq jasandy ıntellektini meńgertýdi kózdep otyr.