Qazaqstanda memlekettik qyzmetshilerdi konkýrssyz aýystyrý tártibi ózgerdi
ASTANA. KAZINFORM – Qazaqstanda memlekettik qyzmetshilerdi konkýrs ótkizbeı bir laýazymnan ekinshisine aýystyrý tártibi ózgerdi. Prezıdent 17 qazanda tıisti jarlyqqa qol qoıdy.
Jańa ózgerister «B» korpýsyndaǵy memlekettik qyzmetshilerge qatysty. Qujatta olardy bos nemese ýaqytsha bos turǵan laýazymdarǵa konkýrssyz taǵaıyndaýǵa bolatyn jaǵdaılar naqtylanǵan.
Atap aıtqanda, «Qazaqstan Respýblıkasynyń memlekettik qyzmeti týraly» zańda burynnan qarastyrylǵan jaǵdaılardan bólek, memlekettik qyzmetshilerdi mynadaı tártippen aýystyrýǵa bolady:
1. Prezıdent Ákimshiligine, Qaýipsizdik Keńesiniń, Quryltaıdyń, Úkimettiń apparattaryna, Prezıdent Іs basqarmasyna jáne Qazaqstan Halyq Keńesiniń hatshylyǵyna konkýrssyz aýystyrýǵa ruqsat etiledi. Sondaı-aq osy mekemelerde jumys isteıtin qyzmetkerler basqa memlekettik organdarǵa konkýrssyz aýysa alady. Bul tártip «B» korpýsyndaǵy laýazymdarǵa qatysty.
2. Joǵaryda atalǵan memlekettik organdardyń qyzmetkerleri óz mekemesiniń ishinde bir laýazymnan ekinshisine konkýrssyz aýysa alady.
3. Saıası memlekettik qyzmetshiler men «A» korpýsyndaǵy ákimshilik memlekettik qyzmetshiler «B» korpýsyndaǵy laýazymdarǵa konkýrssyz taǵaıyndala alady.
4. «B» korpýsyndaǵy memlekettik qyzmetshiler de bir laýazymnan ekinshisine konkýrssyz aýysa alady. Biraq ol úshin qazirgi qyzmetinde keminde bir jyl jumys isteýi kerek. Sondaı-aq qatarynan tórt toqsan boıy jumysy «fýnktsıonaldyq mindetterin tıimdi oryndaıdy» dep baǵalanýy tıis.
5. Eger ýaqytsha bos turǵan laýazymnyń negizgi qyzmetkeri jumysqa qaıta oralsa, onyń ornynda júrgen «B» korpýsynyń memlekettik qyzmetshisin sol mekemedegi tómengi laýazymǵa konkýrssyz aýystyrýǵa bolady.
Degenmen konkýrssyz aýysý úshin memlekettik qyzmetshi jańa laýazymnyń biliktilik talaptaryna saı bolýy qajet. Buǵan qosa, sońǵy alty aıda memlekettik qyzmetke kir keltiretin áreketi nemese qyzmettik ádepti buzǵany úshin tártiptik jazasy bolmaýy tıis.
Jarlyq 17 qazannan bastap kúshine endi.
Buǵan deıin memlekettik qyzmetshilerdiń júktemesi 30 paıyzǵa deıin tómendeıtini habarlandy.
