Qazaqstanda memlekettik qyzmetke qabyldaý tolyq avtomattandyrylady
ASTANA. KAZINFORM — Qazaqstanda memlekettik qyzmetke irikteý júıesi tolyq tsıfrlyq formatqa kóshiriledi. Bul týraly Memlekettik qyzmet isteri agenttiginiń Astana qalasy boıynsha departamentiniń basshysy Erbol Joldanǵar málim etti.
Onyń aıtýynsha, negizgi ózgeristerdiń biri — memlekettik qyzmetke qabyldaý úderisin «e-Qyzmet» tsıfrlyq júıesi arqyly tolyq avtomattandyrý. Endi kadrlardy irikteý men basqarý protsesteri tsıfrlyq formatta júzege asyrylady.
— Bul ashyqtyqty jáne úmitkerlerdiń memlekettik qyzmetke barlyq saladan kelýin qamtamasyz etedi. Sonymen qatar eger laýazym 3 aıdan artyq bos bolsa, «e-Qyzmet» júıesinde avtomatty túrde konkýrs jarııalanady, — dedi Erbol Joldanǵar Astana qalasy kommýnıkatsııalar qyzmetiniń alańynda.
Sondaı-aq memlekettik qyzmetke qajetti kadrlardy erte kezeńnen daıarlaý tetigi engiziledi. Atap aıtqanda, joǵary bilimniń jekelegen mamandyqtary men bilim berý baǵdarlamalary boıynsha memlekettik bilim berý tapsyrysy negizinde oqýǵa qabyldaý konkýrstyq tártippen júzege asyrylmaq.
— Mundaı tásil memlekettik apparattyń naqty qajettiligine saı jas mamandardy aldyn ala daıarlaýǵa múmkindik beredi, — dedi ol.
Sonymen qatar onyń aıtýynsha, jas ári talantty mamandardy memlekettik qyzmetke tartý maqsatynda memlekettik qyzmetke kirýge daıyndyq ınstıtýtyn engizý kózdelip otyr. Atalǵan ınstıtýt memlekettik fýnktsııalardy tıimdi oryndaýǵa qajetti negizgi quzyretterdi qalyptastyrýǵa jáne damytýǵa baǵyttalǵan bilim berý, oqytý jáne tárbıe is-sharalarynyń keshenin qamtıdy.
Aıta keteıik, Memleket basshysy «Qazaqstan Respýblıkasynyń memlekettik qyzmeti týraly» zańǵa qol qoıdy.
