Qazaqstanda memlekettik-jekeshelik áriptestikti kúsheıtý joldary usynyldy
«Jalpy memlekettik-jekeshelik áriptestikti damytýda oń serpindi atap ótkimiz keledi. Sonymen qatar, osy baǵyttaǵy tıimdilikti arttyrý úshin myna joldardy usynamyz. Aldymen, ortalyq jáne jergilikti atqarýshy organdar rásimderdi jeńildetý boıynsha jańalyqtardy eskere otyryp, bastamashylyq jasalǵan barlyq jobalardy konkýrs satysyna deıin jetkizý qajet. Sondaı-aq, MJÁ jobalaryn sapaly túrde iske asyrý úshin jasalǵan sharttar boıynsha qabyldanǵan mindettemelerdiń turaqty monıtorıngin jáne tolyq oryndalýyn qamtamasyz etý kerek», - dedi mınıstr.
Tımýr Súleımenovtyń aıtýyna qaraǵanda, 2017 jyly jasalǵan 160 sharttyń 41 jobasy mınıstrlik bekitken 10 úlgilik qujattamany paıdalana otyryp ázirlengen.
«Qazirgi tanda salalyq memlekettik organdarǵa Ulttyq ekonomıka mınıstrligimen kelise otyryp, jetekshilik etetin salalary boıynsha úlgilik qujattamalardy ázirleý quzyreti berildi. Osyǵan oraı, salalyq memlekettik organdarǵa óńirlerdiń osy jobalarǵa degen aǵymdaǵy suranysyn eskere otyryp, úlgilik qujattamalardy ázirleýdi bastaý qajet», - dedi ol.
Mınıstr MJÁ baǵytyn damytý úshin sondaı-aq, sharttardy túgendeýdi tolyq aıaqtaý jáne óńirlerdiń mindettemelerdi qabyldaýyn baqylaý úshin Qarjy mınıstrligine 2017 jyldyń 10 maýsymyna deıin jasalǵan MJÁ sharttaryn tirkeý júrgizýdi usyndy.
