Qazaqstanda memlekettik-jekeshelik áriptestik jobalarynyń quny 2 trln teńgege jýyqtady

ASTANA. QazAqparat - Memlekettik-jekeshelik áriptestiktigi iske asyrylyp jatqan jáne daıyndyq ústindegi jobalardyń quny 2 trln teńgege jýyq qarjyny qurady. Bul týraly Senatta memlekettik-jekeshelik áriptestik taqyrybyna arnalǵan dóńgelek ústel otyrysynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.

«2016 jylǵa deıingi barlyq kezeńde 61 mlrd teńgege 23 shart iske asyryldy. Al 2017 jyldyń ózinde olardyń sany 7 esege artty. Bir jyldyń ishinde 146 mlrd teńgege 160 kelisimshart bekitildi. Bıyl 11 kelisimshartqa qol qoıyldy. Jalpy, memlekettik-jekeshelik áriptestiktiń qoldanystaǵy portfeli 194 jobany qamtyp otyr, bul ótken 10 jylǵa qaraǵanda 8 esege artyq. Aǵymdaǵy jobalardyń quny 402 mlrd teńge jáne daıyndyq kezeńindegi taǵy 500 joba 1,5 trln teńgege baǵalanǵan», - dedi Dálenov.

Osy oraıda ol bundaı jobalardyń artýyna 2015 jyldyń sońynda qabyldanǵan tıisti zańnama yqpal etkenin atap ótti. Atalǵan 194 jobada búginde túrli salalar qamtylǵan.

Rýslan Dálenovtyń sózine qaraǵanda, memlekettik-jekeshelik áriptestiktiń jyldam ósýine negizgi faktor retinde sońǵy jyldary jeke qarjylyq bastamalar men jergilikti atqarýshy organdardyń ózindik qadamary da áser etti.