Qazaqstanda memlekettik jalǵa beriletin turǵyn úıler qoryn basqaratyn kompanııa qurylady
ASTANA. 26 shilde. QazAqparat - QR Qurylys jáne turǵyn úı-kommýnaldyq sharýashylyq isteri agenttigi «Qazaqstan Respýbılkasynyń turǵyn-úı qatynastary jónindegi birqatar zańnamalyq aktilerine ózgerister men tolyqtyrýlar engizý týraly» Zań jobasyn ázirleýmen aınalysatyn jumys tobyn qurady.
Bul týraly búgin atalǵan vedomstvonyń alqa májilisinde agenttik tóraǵasynyń orynbasary Nıkolaı Tıhonıýk málim etti.
Onyń atap ótýinshe, atalǵan zań jobasy memlekettik jalǵa beriletin turǵyn úıler qoryn basqaratyn mamandandyrylǵan kompanııa qurý normasyn qarastyrady.
«Turǵyn úıdi paıdalanýǵa berý barysynda memlekettik turǵyn úı qoryna jatatyn barlyq páterler jekeshelendirilgenge deıin kondomınıým nysany bolyp tabylmaıdy ári óziniń basqarý organy joq. Sondyqtan da osy kezeń aralyǵyna mamandandyrylǵan basqarýshy kompanııa qurý boljanýda», - dedi ol.
N.Tıhonıýktiń sózine qaraǵanda, bul kompanııa jınalystar ótkizý, páter jaldaýshylardan jazbasha saýalnama alý, jınalys hattamalaryn rásimdeý, jalpy jınalys sheshimderiniń oryndalýyn uıymdastyrý, servıstik qyzmet sýbektilerimen kelisimshart jasasyp, onyń oryndalýyn qadaǵalaý jumystarymen aınalysatyn bolady.
