Qazaqstanda memlekettik tildi úırenemin degen adamǵa barlyq jaǵdaı jasalǵan - Mádenıet jáne aqparat mınıstri M. Qul-Muhammed
Qazaqstanda memlekettik tildi úırenemin degen adamǵa barlyq jaǵdaı jasalǵan. Bul týraly búgin QR Parlamenti Májilisinde ótken Úkimet saǵatynda QR Mádenıet jáne aqparat mınıstri Muhtar Qul-Muhammed málim etti,
dep habarlaıdy QazAqparat.
«Tilderdi qoldaný men damytýdyń 2001-2010 jyldarǵa arnalǵan baǵdarlamasy bıyl aıaqtalady. Sondyqtan da, kelesi jyly osy baǵyttaǵy jańa baǵdarlama jasaýǵa kiristik. Jalpy alǵanda memlekettik tildi oqytýdyń ádistemesi de únemi jetildirilip keledi. Aǵymdaǵy jyly 8 sózdik jaryq kórdi. Memlekettik qyzmetkerdiń tildik portfeli shyǵaryldy, onda 19 atalym, elektrondy-aýdıo-beıne oqýlyqtar, grammatıkalyq anyqtamalyqtar men oqý sózdikteri jınaqtalǵan. Jalpy, memlekettik tildi úırenemin degen adamǵa Qazaqstanda barlyq jaǵdaı jasalǵan. Oqýlyq ta, oqý-úırený quraldary da, ádistemelik nusqaýlyq ta, sózdikter de júzdegen myń taralymmen shyǵaryldy. Endeshe til bilemin degen adamǵa yqylas bolsa boldy, qalǵany jetkilikti qamtylǵan. Tipti qoǵamdyq ómirdiń túrli salalary boıynsha arnaıy tilasharlardy da shyǵarýǵa kiristik», dedi M. Qul-Muhammed.
Onyń aıtýynsha, bıyldyń ózinde ǵana onshaqty qazaqsha-oryssha tilashar jaryq kórgen. Ózge tildi azamattarǵa memlekettik tildi oqytýdyń úzdik ádistemesin jasaýǵa baıqaý jarııalanǵan. «Bul baıqaý boıynsha 30-ǵa jýyq joba kelip tústi. Kelesi jyly osy joba boıynsha úzdik dep tanylǵandar mol taralymmen shyǵatyn bolady», dedi mınıstr.
