Qazaqstanda memlekettik sheneýnikterdiń «A» korpýsy qurylady
ASTANA. 19 qazan. QazAqparat - Qazaqstandaǵy ákimshilik reformalar aıasynda memlekettik qyzmetkerlerdiń «A» korpýsy qurylatyn bolady.
Bul týraly búgin Astanadaǵy jıynda QR Prezıdenti janyndaǵy Memlekettik basqarý akademııasynyń rektory Bolatbek Ábdirasylov málim etti.
Onyń aıtýynsha, búginde ondaı júıe damyǵan memleketter de bar. «A» korpýsy joǵary sanatty «kasta» ispettes. Oǵan kiretin memlekettik qyzmetkerlerdiń kásibı daıyndyǵy úzdik bolýy shart. Atalǵan «top» basqarýshy ákimshilik laýazymdardy atqarady. Olar san alýan saıası ózgeristerge qaramastan, óz qyzmetterin aýystyrmaıdy», - deıdi B.Ábdirasylov. Akademııa basshysy atap kórsetkendeı, onymen qosa, «saıası» sanattaǵy memlekettik qyzmetkerler bolady. Olardyń qataryna mınıstrler, vıtse-mınıstrler, ákimder men ákim orynbasarlary kiredi. «Osy sanattaǵy memlekettik qyzmetkerlerdiń sany qysqartylatyn bolady. Árıne, «A» korpýsyna negizgi basymdyq berilmek. Sebebi ol barlyq ákimshilik reformalardy júzege asyrýy tıis», - deıdi B.Ábdirasylov.
