Qazaqstanda memlekettik satyp alýlarda básekelestik damytylady
NUR-SULTAN. QazAqparat- Qazaqstanda memlekettik satyp alýlarda básekelestik damytylady. Mundaı jańashyldyq Qazaqstan Respýblıkasynyń keıbir zańnamalyq aktilerine básekelestikti damytý máseleleri boıynsha ózgerister men tolyqtyrýlar engizý týraly zań jobasynda qarastyrylǵan, dep habarlaıdy QazAqparat tilshisi.
«Zań jobasynyń tórtinshi baǵyty – bul memlekettik satyp alýlardaǵy básekelestikti damytý. Aralas ekonomıka jaǵdaıynda satyp alýlardy júzege asyrý barysynda memleket ekonomıkanyń tutas bir salasynyń iri tutynýshysy retinde bolady ári satyp alýdy kásipkerlik qoldaýdyń qýatty quralyna aınaldyrady», - dedi zań jobasyn Májiliste tanystyrǵan QR Básekelestikti qorǵaý jáne damytý agenttigi tóraǵasynyń birinshi orynbasary Rústem Ahmetov.
Onyń dereginshe, 2020 jyldyń ózinde ǵana tikeleı kelisimshart jasasý arqyly bir kózden memlekettik satyp alý kólemi 2 trln 300 mlrd teńgege jetken. Bul memlekettik satyp alýlardyń jalpy kóleminiń 40 paıyzyna jýyǵyn nemese jalpy ishki ónimniń 3,6 paıyzyn quraıdy.
«Osyǵan oraı bir kózden 9 negizgi satyp alýdy shekteý usynylady. Onyń úsheýin múldem alyp tastaý qajet. Ekonomıkalyq tıimdilik jyl saıyn 49 mlrd teńgeden astam qarjyny quraıdy», - dedi ol.
