Qazaqstanda memlekettik satyp alýlar áldeqaıda jeńildetiledi
ASTANA. QazAqparat - Qazaqstanda memlekettik satyp alýlar baıqaýy jeńildetiledi. Bul týraly búgin Ortalyq kommýnıkatsııalar qyzmetinde ótken brıfıngte QR Qarjy vıtse-mınıstri Rýslan Beketaev málim etti.
Onyń aıtýynsha, Memlekettik satyp alýlar týraly jańa zań jobasynda baıqaý men aýktsıonnyń júıesin jeńildetý boıynsha talaptar qarastyrylyp otyr.
«Baıqaýǵa qatysý týraly ótinish pen baǵa usynysy birge tapsyrylady. Ol baıqaýdyń ýaqyty men kezeńin qysqartýǵa múmkindik beredi. Sonymen qatar tapsyrys berýshiniń óziniń qyzmetin asyra paıdalanýy shekteledi. Aýktsıon qazirgideı 3 kezeńnen emes, 2 kezeń boıynsha ótetin bolady. Birinshi kezeńde aýktsıonǵa qatystyrý týraly sheshim jasalsa, ekinshi kezeńde aýktsıonnyń ózi ótedi. Eń az baǵa usynǵan jetkizýshi jeńimpaz dep tanylady», - dep atap ótti ol.
Vıtse-mınıstrdiń aıtýynsha, ózin-ózi tanytqan, memlekettiń senimdi seriktesteri baıqaýda qujat tapsyryp álek bolmaıdy. Birden ótinish tastap, baıqaýdyń ekinshi kezeńine óte alady.
«Senimdi kompanııalar bar, baıqaýdan baıqaýǵa sol bir qujattardy tapsyra beredi. Bizde belgili bir kásiporyndardyń pýly qalyptasty. Olar ózin ózi kórsetken, senimdi memlekettik seriktester. Birinshi kezeńde biz sondaı senimdi, bilikti kompanııalardyń tizimi arqyly jumys jasaımyz. Olarǵa árdaıym qujat tapsyryp otyrý qajet emes. Ekinshi kezeńde tek baıqaý úderisterine qatysty sharalar ótedi», - deıdi R.Beketaev.
«Investıtsııalardy tartý jáne joǵary tehnologııaly ónimder óndirisin yntalandyrý maqsatynda biz úsh jylǵa deıingi uzaqmerzimdi kelisimsharttardy jasaý múmkindigin beremiz», - dep túıindedi vıtse-mınıstr.
