Qazaqstanda memlekettik organdarǵa jastar saıasatyn júzege asyrýdy mindetteıtin ýákil laýazymy engizilýi múmkin
ASTANA. 12 naýryz. QazAqparat - Memlekettik jastar saıasatyn qamtyǵan zań jobasy Elbasy saıasatyna uzaqmerzimdi sıpat berýge baǵyttalady.
Búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Bilim jáne ǵylym mınıstriniń orynbasary Mahmetǵalı Sarybekov osylaı málim etti.
«Aǵymdaǵy jylǵy Elbasynyń halyqqa arnaǵan Joldaýynda jastar saıasatynyń birqatar baǵyttary qamtyldy. Atap aıtqanda, jastar kásipkerligi, qoljetimdi jáne sapaly bilim, jastardyń rýhanı-adamgershilik tárbıesi, baspana máselesi, oqýshy jastarǵa jolaqy jeńildikterin qarastyrý, jastardy eńbekpen qamtamasyz etý máseleleri basym baǵyttar retinde qaralyp, bulardyń aldyńǵy kezekte oryndalýy tıistigi belgilendi. Osyǵan oraı, zań jobasynyń mindeti - Elbasynyń jastar saıasatyna uzaqmerzimdi sıpat berý úshin zańnamalyq negiz jasaý», - dedi mınıstrdiń orynbasary.
Jalpy alǵanda zań jobasynda erkin ýaqytty qamtamasyz ete otyryp, jastardyń qarym-qatynas ortalyqtaryn (resýrsty ortalyqtar, áleýmettik qyzmetter) qurý arqyly jastardyń azamattyq jaýapkershiligi men patrıotızmin damytýdyń keshendi sharalary kózdeledi. Budan bólek, memlekettik organdarǵa naqty jastar saıasatyn júzege asyrýdy mindetteıtin ýákildikti engizý qarastyrylady.
