Qazaqstanda memlekettik organdardyń derekter bazasyn saqtaıtyn platforma qurylady
ASTANA. QazAqparat - Qazaqstanda asa mańyzdy aqparatty, atap aıtqanda memlekettik organdardyń derekter bazasyn rezervtik saqtaýǵa arnalǵan biryńǵaı platforma qurylady. Bul týraly QR UQK Aqparattyq tehnologııalar kómegimen jasalatyn qylmystarǵa qarsy áreket jónindegi basqarmasynyń basshysy Ǵalymbek Tátenov málimdedi, dep habarlaıdy QazAqparat tilshisi.
«Zań jobasynda elektrondy aqparattyq resýrstardy asa mańyzdy ınfraqurylym retinde rezervtik saqtaýǵa arnalǵan biryńǵaı platforma qurý qarastyrylǵan. Bul neni bildiredi? Mańyzdy aqparattardy, joǵalǵan jaǵdaıda memlekettik protsesterdiń toqtaýyna ákep soǵyp, ulttyq qaýipsizdikke qater tóndirýi múmkin aqparattardy jáne memlekettik organdardyń derekter bazasyn Úkimet asa mańyzdy dep bekitedi. Bıylǵy jazda jasalǵan shabýyldar álem boıynsha kóptegen aqparattyq júıelerdi shıfrlap tastady», - dedi Ǵ.Tátenov QR Parlamenti Senatynyń áleýmettik mádenı damý jáne ǵylym komıtetiniń keńeıtilgen otyrysynda.
Tátenovtyń aıtýynsha, rezervtik platformalar arqyly negizgi aqparat joǵalǵan jaǵdaıda, Internetke qosylmaǵan derbes kóshirmeler kómekke keledi.
Sondaı-aq, barlyq Qazaqstan turǵyndarynyń derekter bazasynyń kóshirmesin alý josparlanyp otyr, osy arqyly tótenshe shabýyl jaǵdaıynda jeke derekterdiń joǵalýyna jol berilmeıdi.
Memleket basshysynyń Qazaqstannyń kıberqorǵanysyn qurý týraly tapsyrmasyn oryndaý maqsatynda QR UQK men QR Qorǵanys jáne aeroǵarysh ónerkásibi mınıstrligi Halyqtyń densaýlyǵy jáne densaýlyq saqtaý kodeksine ózgerister engizýdi usyndy. QR Qorǵanys jáne aeroǵarysh ónerkásibi mınıstrligi aqparattyq qaýipsizdik salasyndaǵy ýákiletti organ bolmaq.
Zań jobasyna sáıkes, Halyqtyń densaýlyǵy jáne densaýlyq saqtaý kodeksine elektrondy aqparattyq resýrstardy rezervtik saqtaý biryńǵaı platformasyndaǵy kóshirmelerdiń jiberilýi dárigerlik qupııany jarııalaý bolyp tabylmaıtyny kórsetiletin tarmaqsha engiziledi.
