Qazaqstanda memlekettik qyzmetterdiń biryńǵaı provaıderi bolatyn arnaıy korporatsııa qurylady - AEF
Bul týraly búgin Astana ekonomıkalyq forýmynda QR Investıtsııalar jáne damý mınıstrligi Baılanys, aqparattandyrý jáne aqparat komıtetiniń tóraǵasy Sáken Sársenov málim etti.
«Biz memlekettik qyzmetterdiń biryńǵaı provaıderi bolatyn memlekettik korporatsııa quramyz. Bul Kanada men Avstralııa elderiniń tájirıbesi. Qazaqstan azamattary barlyq memlekettik qyzmetterdi bir jerden alatyn bolady. Sonymen qatar biz úkimettiń tolyqtaı ashyq bolýyn qamtamasyz etemiz. Úkimet memlekettik qupııalardan bólek, óz qyzmetiniń barlyq málimetterin usynady. Sonymen qatar ortalyq memlekettik organdardyń statıstıkalyq málimetteri onlaın rejimde qoljetimdi bolady», - dedi ol.
Onyń aıtýynsha, Elbasynyń «100 naqty qadam» baǵdarlamasynda biryńǵaı qyzmetter usynatyn korporatsııa qurý jóninde tapsyrma berilgen. Ol Halyqqa qyzmet kórsetý ortalyqtary bazasynda qurylmaq. «Onda memlekettik qyzmetter usynatyn barlyq uıymdar toptastyrylatyn bolady. Barlyq memlekettik qyzmetterdi osy korporatsııa usynady. Azamattar tek bir jerge baryp, ózine qajetti qyzmetti ala alady», - dedi S.Sársenov.
«Osylaısha, biz memlekettik organdardyń ashyqtyǵyn qamtamasyz etemiz. Bul óz kezeginde memlekettik saıasatty qalyptastyrý kezinde azamattardyń belsendi atsalysýyna septigin tıgizedi. Búginde ashyq málimetter portaly jumys istep jatyr. Kólik, qaýipsizdik, medıtsına, bilim berý, áleýmettik qorǵaý salalary boıynsha 219 málimetter toby usynylǵan», - dep atap ótti ol.
