Qazaqstanda memlekettik qyzmetshilerge qashyqtan jumys isteý tıimdi me
Halyqaralyq konferentsııa memlekettik qyzmet salasyndaǵy qashyqtan jumys isteýdiń halyqaralyq jáne otandyq tájirıbelerin pysyqtaý jáne tıimdi usynystardy ázirleýge baǵyttaldy. Shara barysynda Grýzııa, Ázirbaıjan elderiniń memlekettik qyzmet salasyndaǵy belgili sarapshylary, AQSh-tyń korporatıvtik sektor ókilderi, sonymen qatar otandyq sarapshylar spıkerler retinde sóz sóıledi.
Konferentsııaǵa qatysýshylar sheteldik tájirıbeni tanystyra otyryp, qoldanystaǵy tájirıbe negizinde qashyqtan jumys isteýdiń tıimdi tustary men kemshilikterine, materıaldyq jaýapkershilik pen aqparattyq qaýipsizdik salasyndaǵy ózekti máselelerge toqtaldy.
Qazirgi ýaqytta karantın engizilgen sátten bastap, elimizde 70 paıyzǵa jýyq memlekettik qyzmetshiler qashyqtan jumys isteýde. Konferentsııa barysynda pandemııa jaǵdaıynda qyzmetkerlerdiń eńbek tártibin saqtaýyn qadaǵalaý maqsatynda geolokatsııa fýnktsııanyń qoldanylýy, ıaǵnı qyzmetkerdiń jumys ýaqytyndaǵy ornalasqan ornyn (qozǵalysyn) qadaǵalaý tájirıbesi atap ótildi.
MQІA Atyraý oblysy boıynsha departamentiniń basshysy Salaýat Múksimov oblystyń 1200 memlekettik qyzmetshisi arasynda qashyqtan jumys isteý týraly júrgizilgen saýalnama qorytyndysymen bólisti.
«Saýalnamaǵa qatysqan memlekettik qyzmetshilerdiń 77 paıyzy qashyqtan jumys isteý barysynda ózin-ózi damytýǵa ýaqytynyń kóbeıgenin alǵa tartsa, 57% shyǵarmashylyq jáne ıntelektýaldyq múmkindikteri men qabiletteriniń artqanyn baıqaǵan. Respondentterdiń 16 paıyzy qashyqtyqtan jumys isteýge kishkentaı balalarynyń, al 5 paıyzy ózge otbasy músheleriniń kedergi keltiretinin kórsetse, 15 paıyzy ózin-ózi qolǵa alýdyń qıyndaǵanyn atap ótken. Memlekettik qyzmetshilerdiń otbasy músheleriniń 92 paıyzy qashyqtan jumys isteýge «óte jaqsy» jáne «jaqsy» degen baǵa bergen. Alaıda, memlekettik qyzmetshilerdiń bul máselege qatysty óz kózqarasy árqıly. Úıden otyryp jumys isteýdiń qolaılylyǵyn memlekettik qyzmetshilerdiń 57 paıyzy qoldap otyr», - dedi ol.
Mamandardyń paıymynsha, qashyqtan jumys isteý memlekettiń shyǵyndaryn da qysqartýǵa, onyń ishinde elektr energııasyn únemdeý, baılanys quraldary men keńse tehnıkasyna jumsalatyn shyǵyndardyń azaıýyna septigin tıgizip otyrǵandyǵy belgili boldy. Konferentsııada jahandaný men aqparattyq-baılanys júıeleriniń damýy kezeńindegi qazirgi zaman aǵymynyń talabyna saı keletin jumyspen qamtýdyń yńǵaıly jańa túrleriniń qajettiligi baıandaldy.
