Qazaqstanda memlekettik qyzmetshilerdiń merzimnen tys jumys ýaqyty táýligine eki saǵattan aspaýy kerek
«Ár qyzmetshi úshin merzimnen tys jumys ýaqyty táýligine eki saǵattan aspaýy kerek, al merzimnen tys jumystyń jalpy uzaqtyǵy aıyna on eki saǵattan, jylyna júz jıyrma saǵattan aspaýy tıis», - dedi QR eńbek jáne turǵyndardy áleýmettik qorǵaý mınıstrligi agenttik joldaǵan saýalǵa.
Vedomstvo qoldanystaǵy QR Eńbek kodeksine sáıkes, qyzmetker eńbek tártibin, qyzmetkerdi tártiptik jaýapkershilikke tartatyn quqyq buzýshylyqtardy saqtaýǵa mindetti ekenin aıtty. Óz kezeginde jumys berýshi eńbek zańnamalary talaptaryn, kelisimderdi, ujymdyq jáne eńbek kelisimsharttaryn saqtaýǵa jáne qyzmetkerdi eńbek jaǵdaıymen qamtamasyz etýge mindetti.
QR «Qazaqstan Respýblıkasynyń memlekettik qyzmet týraly» Zańyna sáıkes, memlekettik qyzmetshiler úshin eki kúndik demalysymen bes kúndik jumys aptasy belgilengen.
Eńbek zańnamalaryn buzǵan tulǵalar zańnamaǵa sáıkes jaýapqa tartylady. Máselen, eger jumys berýshi óziniń qyzmetshilerine qatysty eńbek quqyqtaryn buzsa, ol qyzmetkerler nemese olardyń senimdi ókilderi eńbek ınspektsııasy basqarmasynyń kómegine júgine alady.
Eńbek ınspektsııasy berilgen aryz negizinde uıymǵa tekserý júrgizedi, quqyq buzýshylyqtar anyqtalǵan jaǵdaıda, QR zańnamasymen qarastyrylǵan sharalar qoldanylatyn bolady.
Vedomstvo málimetinshe, memlekettik eńbek ınspektorlary 2017 jyldyń qańtar-qyrkúıek aılarynda eńbek zańnamalarynyń saqtalýy boıynsha 7743 kásiporynǵa tekseris júrgizgen. Tekseris barysynda 11 019 quqyq buzýshylyq anyqtaldy, olardyń qatarynda 7400 - eńbek qatynastaryna baılanysty, 212 - jumys ýaqytyn zańsyz normadan asyrý (2016 jyldyń osy kezeńinde - 194, byltyr jyl boıy - 284 derek tirkelgen). Memlekettik eńbek ınspektorlary júrgizgen tekseris nátıjesi boıynsha, 360,2 mln teńge kóleminde 2326 ákimshilik aıyppul tóleý taǵaıyndaldy.
Ákimshilik quqyq buzýshylyq týraly kodekstiń 87-baby 3-bóliminde kózdelgen merzimnen tys jumys eńbekaqysyn tóleý boıynsha Qazaqstan Respýblıkasynyń eńbek zańnamalarynyń talaptary buzylǵan jaǵdaıda, sondaı-aq, merekelik nemese demalys kúnderindegi jumys jáne túngi ýaqyttaǵy jumys eńbekaqysyn tóleý boıynsha 30-dan 120-ǵa deıin AEK kóleminde ákimshilik aıyppul tóleý túrinde jaýapkershilikke tartý qarastyrylǵan. Atalǵan quqyq buzýshylyq bir jyl ishinde qaıtalanǵan jaǵdaıda, 60-tan 150-ge deıin AEK kóleminde ákimshilik aıyppul tóleýge tartylady.
Qazaqstanda 1 qańtardan bastap 1 AEK kólemi 2269 teńgeni quraıdy.
