Qazaqstanda memlekettik qyzmetkerlerdiń jumysyn BAQ jáne bıznes baǵalaıdy - Á.Báımenov
ASTANA. 25 maýsym. QazAqparat - Qazaqstandyq memlekettik qyzmetkerlerdi oqytý baǵdarlamasyna "Memlekettik qyzmet BAQ jáne bıznes kózimen" baǵdarlamasy engiziledi.
QR Premer-Mınıstri resmı saıtynyń habarlaýynsha, QR Memlekettik qyzmet isteri agenttiginiń tóraǵasy Álıhan Báımenov memlekettik qyzmet kórsetý máseleleri jónindegi qoǵamdyq otyrysta osylaı málim etken.
«Memlekettik qyzmetkerler, memlekettik organ basshylary qoǵam aldynda qalaı kórinedi, BAQ quraldary, bıznes-qaýymdastyqtar olardy qalaı baǵalaıdy, sol jaıly aqparat bolsa eken deımiz», - dedi Á.Báımenov.
Osyǵan baılanysty vedomsto basshysy memlekettik basqarý jáne óńirlik oqytý ortalyqtarynda memlekettik qyzmetkerlerdiń biliktiligin arttyrý kýrstary aıasynda "Memlekettik qyzmet BAQ kózimen" jáne "Memlekettik qyzmet bıznes kózimen" baǵdarlamalaryn engizýdi tapsyrǵanyn aıtty.
Onyń atap ótýinshe, memlekettik qyzmet kórsetýdi jaqsartý jáne monıtorıngileý aıasynda memlekettik qyzmet kórsetýler týraly zańdy iske asyrý maqsatynda qoǵamdyq keńes qurylǵan. Oǵan jýrnalıster de, bıznes-qaýymdastyq ókilderi de kiredi. Mundaı keńester agenttik departamentteriniń janynda barlyq óńirlerde qurylady.
Aatalǵan ınstıtýttyń negizgi mindeti - halyqqa qyzmet kórsetý kezindegi memleket pen azamattyq qoǵam arasyndaǵy baılanysty qamtamasyz etý.
Sonymen qatar, keńester memlekettik organ basshylaryna memlekettik qyzmetter sapasyn arttyrý boıynsha usynystar ázirleıdi. Budan ózge, keńester jeke tulǵalarmen jáne úkimettik emes uıymdarmen ózara árekettesetin bolady.
