Qazaqstanda memlekettik qyzmet mektebi qurylady

ASTANA. QazAqparat - Memlekettik organ ókilderi beıresmı jaǵdaıda kezdesip, «Ózgeristerdi ózińnen basta» ishki baǵdarlamasy aıasynda memlekettik qyzmetshilerdiń sanasyn ózgertý máselelerin talqylady.

«Rýhanı jańǵyrý» baǵdarlamasynyń «Ózgeristerdi ózińnen basta» ishki baǵdarlamasyna Memlekettik qyzmet isteri jáne sybaılas jemqorlyqqa qarsy is-qımyl agenttigi jetekshilik etýde.

Kezdesýde memlekettik organdardyń uıymdastyrýshylyq mádenıetindegi ózgerister máseleleri talqylandy.

QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova memlekettik qyzmettiń ashyqtyǵy men tartymdylyǵyna yqpal etetin eki jobany júzege asyrýǵa bastamashylyq etýde.

«Birinshi joba - memlekettik qyzmet mektebi - oqý ordalarynyń bitirýshi stýdentterin memlekettik organdarda taǵylymdamadan ótkizýdi qarastyrady. Bul tásil túlekterdiń qyzmetke ornalasýy kezinde tańdaý jasaýyna yqpal etedi», - delingen Agenttiktiń habarlamasynda.
 

Ekinshi joba azamattardy qabyldaý kabınetterin vıdeobaqylaý kameralarymen jabdyqtaýǵa baǵyttalǵan.

«Rýhanı jańǵyrý» baǵdarlamasy aıasynda júzege asyrýdy talap etetin basty másele - memqyzmetshilerdiń sanasyn ózgertý. Árbir memlekettik qyzmetshi ózgerýge qulyqty bolýy tıis», - dep atap ótilgen habarlamada.

Kezdesýdiń qorytyndysy boıynsha, árbir memlekettik organ sanany ózgertý tujyrymdamasy boıynsha óz jobasyn engizip, «Ózgeristerdi ózińnen basta» ishki baǵdarlamasy aıasynda olardyń basymdyqtaryna sáıkes, ony júzege asyrý anyqtalatyny týraly sheshim qabyldandy.