Qazaqstanda memlekettik qordaǵy jer qoınaýyn basqarý baǵdarlamasy ózgeredi

NUR-SULTAN. QazAqparat – QR Premer-Mınıstri Asqar Mamın jer qoınaýyn paıdalaný salasyndaǵy zańnamalyq ózgerister týraly aıtty, dep habarlaıdy QazAqparat tilshisi.

«Jer qoınaýy jáne jer qoınaýyn paıdalaný týraly» kodeksine ozyq halyqaralyq tájirıbeni eskere otyryp, jer qoınaýyn paıdalanýdy quqyqtyq retteýdiń jańa ádisteri men tetikteri engizildi», - dep jazdy Asqar Mamın depýtattyq saýalǵa bergen jaýabynda.

Atap aıtqanda, Kodekste mynadaı tujyrymdamalyq ózgerister engizildi:

- Aýstralııalyq modeldiń úlgisi boıynsha «Birinshi kelgen – birinshi bolyp alady» qaǵıdatyna negizdelgen lıtsenzııalyq tártip engizý,

- Paıdaly qazbalardyń túrlerin jáne jiktelimin belgileý;

- Qordy baǵalaýdyń halyqaralyq tártibine kóshý;

- Geologııalyq aqparatqa ashyq qol jetkizýdi usyný,

- Ekologııalyq qaýipsizdikti qamtamasyz etý úshin jer qoınaýyn paıdalaný saldaryn joıý jónindegi erejelerdi kúsheıtý.

«Zańnamadaǵy atalǵan jańalyqtar memlekettiń jer qoınaýyn paıdalaný salasyn «nusqamalyq baqylaýdan» bas tartýǵa jáne jer qoınaýyn paıdalanýshylardyń adaldyǵy qaǵıdatyna kóshýge múmkindik berdi. Jer qoınaýyn paıdalaný týraly zańnamaǵa turaqty monıtorıng jáne onyń jekelegen normalaryn jetildirý júrgizilýde», - dep atap ótti Premer-Mınıstr.

Onyń aıtýynsha, búgingi tańda Úkimet bastamashy bolǵan túzetýler aıasynda qoldanystaǵy zańnamaǵa mynadaı ózgerister engizý boıynsha jumys júrgizilýde:

1) memlekettik jer qoınaýy qoryn basqarý baǵdarlamasyn (MTQB) bekitý rásimin reglamentteý, merzimderin ońtaılandyrý jáne ashyqtyǵyn qamtamasyz etý;

2) jer qoınaýyn paıdalanýdyń kapıtaldy kóp qajet etetin teńiz jobalaryna ınvestor tartý jáne ishki naryqqa munaı jetkizýshi ınvestorlar men memleket múddeleriniń arasyndaǵy teńgerimdi saqtaý úshin Kaspıı jáne Aral teńizderiniń qazaqstandyq sektorlarynda ornalasqan jer qoınaýyn paıdalanýshylardy munaı jetkizý jónindegi mindettemelerden bosatý;

3) ulttyq kompanııalardyń Jer qoaınaýyn padalaný kodeksiniń 278-baby 8-tarmaǵynda kózdelgen qatty paıdaly qazbalar boıynsha iri ınvestorlardy tartýdy júzege asyrýǵa múmkindik beretin jer qoınaýyn paıdalaný quqyǵyn 2026 jylǵy 1 qańtarǵa deıingi merzimge uzartý;

4) Indýstrııa jáne ınfraqurylymdyq damý mınıstrliginen, ýrandy jáne keń taralǵan paıdaly qazbalardy óndirý jónindegi operatsııalardy qospaǵanda, qatty paıdaly qazbalardy barlaý jáne óndirý jónindegi operatsııalardyń júrgizilýine memlekettik baqylaý jónindegi fýnktsııalardy ekologııa, geologııa jáne tabıǵı resýrstar mınıstrliginiń qaramaǵyna berý;

5) bıýdjet qarajatynyń tıimsiz jumsalýyn bolǵyzbaý úshin bıýdjet qarajaty esebinen geologııalyq barlaý júzege asyrylatyn obektilerdiń jobalaý-smetalyq qujattamasyna ekonomıkalyq saraptama engiziledi.

Zań jobasyn Parlamentke 2022 jyldyń qańtarynda engizý josparlanǵan.