Qazaqstanda memlekettik bıýdjetti josparlaý elektrondy formatqa kóshirilmek
«Qazir biz barlyq bıýdjettik protsesterdi ótpeli tsıfrlandyrý boıynsha úlken keshendi jumys júrgizip jatyrmyz. Aıtalyq, árbir kezeńde árbir fakti boıynsha tikeleı onlaın rejimde «tsıfrlyq izder« birden tirkelip otyrady jáne málimetter, esep-qısaptar ashyq derekózderinde, onyń ishinde «Ashyq bıýdjetter« portalynda avtomatty túrde jarııalanady», - dedi vıtse-mınıstr Aqparatqa qol jetkizý máseleleri jónindegi komıssııanyń otyrysynda.
Onyń atap ótýinshe, atalǵan jumystardyń nátıjesinde memlekettik josparlaý tıimdiligin arttyrý, bıýdjettik josparlaý ashyqtyǵyn qamtamasyz etý, keri baılanysty tıimdiligin jaqsartý mindetteri sheshiletin bolady.
«Sońǵy 2 jylda bıýdjettik josparlaýdyń avtomattandyrylǵan júıesin engizý boıynsha aýqymdy jumys júrgizildi. Bıyl 2021-2023 jyldardyń bıýdjetin josparlaýdy qaǵazsyz elektrondy túrde júzege asyrýǵa nıettenip otyrmyz. Búginde bul júıeni Qarjy mınıstrliginiń jáne ózge de memlekettik organdardyń túrli júıelerimen yqpaldastyryp jatyrmyz. Qazirgi ýaqytta «Ashyq bıýdjetter« portalymen málimetterdi yqpaldastyrý boıynsha jumystar jasaýdamyz. Onda bıýdjettik ótinimder, sonymen qatar bıýdjet jobasy avtomatty túrde portalda jarııalanatyn bolady» - dedi Rýslan Eńsebaev.
Aıta keteıik, Aıda Balaevanyń tóraǵalyǵymen onlaın formatta ótken Aqparatqa qol jetkizý máseleleri jónindegi komıssııanyń otyrysynda múmkindigi shekteýli adamdardyń aqparatqa qol jetkizý máseleleri, memlekettik organdardyń ashyqtyq deńgeıin jyl saıynǵy baǵalaýdyń negizgi qorytyndylary, memlekettik organdardyń ınternet-resýrstarynyń biryńǵaı tuǵyrnamasynyń jumysy, sondaı-aq «Ashyq bıýdjetter» portalyn jetildirý boıynsha jumys josparynyń oryndalýy talqylandy.
